De 24. Dezember 1990 ass e Gesetz a Kraaft getrueden, dat d’Schafe vun engem ëffentleche Schëfffaartsregëster zu Lëtzebuerg erméiglecht huet. Vun deem Dag un huet eist Land en effiziente Regëster an eng interessant Plattform fir Entreprisen aus dem Beräich vun der kommerzieller Schëfffaart. Dat ass schonn erstaunlech fir e Land, dat keen direkten Zougang zum Mier huet.
Do ginn et eng ganz Rei vu Konditiounen, déi erfëllt musse sinn. D’Grondviraussetzunge sinn, datt méi ewéi d’Hallschent vum Schëff a Besëtz vu Bierger aus der Europäescher Unioun oder vun enger Handelsgesellschaft mat Sëtz an engem vun de Memberstaate vun der Europäescher Unioun ass. Fir Charter-Schëffer gëllt dobäi nach, datt déi ganz oder dee gréissten Deel vun der Verwaltung vum Schëff vu Lëtzebuerg aus geschéie muss.
D’Schëff (ob dat elo fir den Transport vu Wueren oder Persounen ass oder ob et fir d’Fëscherei oder de Schleppdéngscht agesat gëtt), dat fir d’éischt de Lëtzebuerger Pavillon ufreet, däerf net méi al si wéi 15 Joer a muss vun enger zougeloossener Klassifikatiounsgesellschaft, wéi zum Beispill American Bureau of Shipping, Bureau Veritas, Korean Registry oder och nach Lloyd’s Register, gepréift gi sinn. Dobäi kennt och nach, datt de Kapitän vum Schëff, dat ënner dem Lëtzebuerger Fändel wëll fueren, aus engem vun de Memberstaate vun der Europäescher Unioun muss kommen.
Villes gëtt bis an de leschten Detail kontrolléiert. Dat geet vun der Kontroll vun der duebeler Schëffswand (bei Tankschëffer) bis hin zum virgeschriwwenen Diplom als Schëffskach, deen déi Leit u Bord mussen hunn, déi sech ëm d’Iesse bekëmmeren. Et gëtt och gekuckt, ob jidderee vum Personal u Bord sozialverséchert ass, ob se all déi virgeschriwwe medezinesch Attester an och déi néideg Ausbildung hunn asw.
Méi an den Detail ze goen, géif eis elo hei ze wäit féieren, an duerfir wëlle mer hei mat der Theorie ophalen an eis e bëssen op de Weltmierer no dem Lëtzebuerger Pavillon maritime ëmkucken.
Zuelen aus dem Joer 2007 soen, datt deemools 155 Schëffer weltwäit ënner dem Lëtzebuerger Fändel ënnerwee waren. Haut sinn et der 201, mee déi Zuel ka sech vun engem Mount op deen aneren änneren. Laut der Registréierungslëscht, déi een op www.maritime.lu ka gesinn, ass dat Klengste vun de Schëffer, déi de Lëtzebuerger Pavillon hunn, d’Beluga 01 mat genee 6 Meter Längt an enger maximaler Charge vun 2 Tonnen. De Besëtzer vun dësem onbemannten Uewerflächegefier ass d’Entreprise Dreding and Maritime Management mat Sëtz zu Capellen. Dës Firma gehéiert zum belsche Jan De Nul Group, dee säi Sëtz zu Lëtzebuerg huet.
An d’Staune versetzen een dogéint d’Moosse vum gigantesche Kranschëff Les Alizés. Dat Schëff gouf 2022 gebaut an ass ganzer 236,8 Meter laang. Et kann 58.977 Tonne Luedung transportéieren a gehéiert, wéi och dat klengste Schëff am Regëster, der Gesellschaft Dreding and Maritime Management vu Capellen.
Hei eng kleng Auswiel vun Nimm vu Schëffer, déi de Lëtzebuerger Pavillon hunn: Cristobal Colon (Schleppsauger- a Baggerschëff), Brahman Express (Véitransporter), Geo Ocean (Vermiessungsschëff), Bourbon Liberty (Versuergungs- a Schlepperschëff), High Explorer (Tankschëff), La Boudeuse (Banneschëff), Hemilea (Yacht) oder och nach Green Pole (Fracht- a Containerschëff). Déi 201 Schëffer kënnen zesummegerechent 1,33 Milliounen Tonnen transportéieren.
Ronn 3.000 Séifuerer, déi all e lëtzebuergescht Schëfffaartsbuch mussen hunn, schaffen de Moment op deenen 201 Schëffer, et sinn der awer wäit méi ugemellt. Deen Ënnerscheed kënnt doraus, datt vill Séifuerer beispillsweis dräi Méint op engem Schëff schaffen, da fir eng gewëssen Zäit engem anere Beruff noginn, uschléissend awer vläicht erëm op e Schëff zeréckkommen.
A puncto Sécherheet bleift nach ze erwänen, datt sech Lëtzebuerg un der europäescher Missioun „Atalanta“ bedeelegt, déi mat zwee Fligeren zum Beispill d’Iwwerwaachung vum Golf vun Aden ofséchert, wou et ëmmer erëm zu Iwwerfäll op Tank- an aner Versuergungsschëffer kënnt.
En Artikel vum Roger Infalt
