Virun allem ass d’Waasser iwwerliewenswichteg. Ouni Waasser funktionéiert nämlech näischt am mënschleche Kierper: Vernoléissegt een d’Drénken, da fänkt en un ze meuteren. D’Waasser ass nämlech Bestanddeel vun alle Kierperzellen an ass och wichteg, fir de ganze Stoffwiessel unzereegen. Dofir gëtt recommandéiert, vill vun deem H₂O (tëschent 1,5 an 2 Liter am Dag) zou sech ze huelen. Domadder kënnen ënner anerem d’Gehier, d’Verdauung, d’Nieren an och d’Haut normal schaffen. Wéi vill Waasser een drénke soll, hänkt awer och vun der jeeweileger Situatioun of. Dreift eng Persoun Sport a schweesst vill, dann ass et natierlech ubruecht, méi Waasser ze konsuméieren. En plus ass Waasser als e gesonden a kalorienaarmen Duuschtläscher bekannt.

De Kierper profitéiert awer net nëmme vun där direkter Zoufuer vum Waasser. Virun allem am Wellnessberäich kënnt eis Haut a Kontakt mam Waasser, wou dëst Element eng heelend Wierkung op de Kierper huet. De Begrëff Spa (aus dem laténgesche sanus per aquam) heescht jo och näischt anescht wéi „gesond duerch Waasser“. Duerch speziell Kuere kënnen d’Duerchbluddung ugereegt a kleng Bobboe geheelt ginn. D’Ofwierkraaft kann z. B. duerch e waarmt oder en äiskaalt Buede gestäerkt ginn. Wann een sech et am Whirlpool gutt goe léisst, da kann d’Séil entspanen. Natierlech ginn et och speziell Offere wéi déi vun engem „basesche Bad“. Duerch d’Schweessen ass et der Haut hei méiglech, gewësse Schadstoffer aus dem Kierper ze eliminéieren an déi am Waasser enthale Mineralien opzehuelen.

Sportlech Aktivitéiten am Waasser hunn awer och e positiven Afloss op d’Gesondheet. D’Waassergymnastik huet zwar meeschtens mam Klischee ze kämpfen, datt se éischter eng Sportaart fir déi méi eeler Leit wier, mee si bréngt awer vill Atoute fir de Kierper mat sech. Virun allem fir Leit, déi mat Problemer vun de Gelenker oder der Wirbelsail ze kämpfen hunn, eegent sech dee Waassersport ideal. Duerch d’Waasser weien d’Muskelen, d’Knachen, d’Seenen an d’Bänner nëmmen nach een Zéngtel vun hirem reelle Gewiicht. Doduerch gëtt de Kierper ganz anescht wéi bei sportlechen Exercicer ausserhalb vum Waasser belaascht. D’Übungen am Waasser reegen ausserdeem net nëmmen den Häerz-Kreeslaf-System an d’Duerchbluddung un, mee hunn am Fong e positiven Effet op de ganze Beweegungsapparat.

Sou gesi kann ee Waassersport wéi den Aqua-Jogging als en effikassen – an awer och ustrengenden – Ganzkierpertraining beschreiwen. Zousätzlech droe Variante wéi den Aquarobic derzou bei, datt ee vill Kalorien derbäi verbrennt an awer och eppes fir seng Ausdauer an de Muskelopbau mécht. A mat dat Bescht derbäi ass: De Verletzungsrisiko ass extreem niddereg. Firwat? Ma ganz einfach: Hefteg Beweegungsofleef ginn nämlech duerch d’Waasser ofgefiedert. Dat ass ee vun de groussen Ënnerscheeder am Verglach zu anere Sportaarten, wou d’Belaaschtung op d’Häerz, d’Knachen, d’Venen an d’Gelenker vill méi grouss ass. Sou kënnt et och net vun ongeféier, datt vill Leit, a virop Sportler, vun Doktere recommandéiert kréien, no Verletzunge mat liichte Schwammübungen nees unzefänken. Dofir ass et och nëmme verständlech, datt d’Schwammen och sou munch Virdeeler mat sech bréngt – quasi déiselwecht wéi bei deenen opgezielte Waassersportaarte virdrun.