Vun der Quell an d‘Fläsch
Gemengewalen 1981. Fënnef vun den néng Membere vum Schäfferot ginn net méi mat an d’Gemengewalen, zwee anerer ginn net méi gewielt an d’Gemeng Biekerech kritt e komplett neie Schäfferot, dorënner zwee jonk Borschten aus der Gemeng, de Camille Gira an de Lucien Bertemes, déi an der Geschicht vun der Gemeng an dem Biekerecher Waasser alle béid nach eng wichteg Roll spille sollten.
Deemools war d’Keess vun der Gemeng eidel, an d’Awunner hu Biekerech a Richtung Nopeschdierfer verlooss ewéi déi bekannte Raten d’Schëff.
Opgrond vun der Iddi vun engem Gemengenaarbechter koum den deemolege Buergermeeschter Jos Seyler, deen zu där Zäit am Staatslabo geschafft huet, enges Daags an d’Gemeng, bepak mat engem Grappvoll Waasserfläschen an e puer Blieder mat Analysen. Déi eng Säit d’Analyse vum Waasser aus der Quell „Mëlleschbuer“, déi zu Biekerech um Kuelebierg entspréngt, déi aner Säit déi vun de bekannte Marken ewéi Evian oder Vittel. „Eist Waasser ass mindestens genee esou gutt ewéi hiert“, soll hien deemools gesot hunn.
Säit Hierscht 1984 däerf d’Waasser vum Biekerecher Hiwwel sech dann och Mineralwaasser nennen. Heimat gëtt de Grondsteen geluecht, fir dem Jos Seyler seng Iddi, d’Biekerecher Waasser enges Daags a Fläschen ofzefëllen an ze verkafen, Realitéit ginn ze loossen.
Hien huet un d’Diere vun de Lëtzebuerger Brauereien, der Rousperter Waasserfabrik an esou muench anere geklappt. Mee kee Mënsch wollt och nëmmen en Cent an dës Aventure investéieren. Labberloosse wollt de Jos Seyler awer net, an esou ass hien am Fréijoer 1985 op Paräis op de „Salon de l’embouteillage“ gereest. Hei ass hien duerch d’Gaasse vun der Ausstellung gelaf, huet sech bei de Professionellen aus dem Secteur berode gelooss, iwwer Produktiouns-Prozesser a Material diskutéiert an erzielt, wat hie mam Waasser aus der Quell um Kuelebierg wëlles hätt, bis op eemol e Mann him op d’Schëller getuppt huet a sot: „Dat do kéint mech interesséieren.“
De Pierre Papillaud war et, deem säin Interessi an dësem Moment wakereg gemaach gouf. Scho bal 26 Joer war de Pierre Papillaud deemools als Direkter um Rudder vun der Bedreiwergesellschaft vun der Quell „Roxane“ am franséische La Ferrière-Bochard an der Normandie, an obwuel si schonn op Metz, Stroossbuerg an Nanzeg geliwwert hunn, konnt de Pierre Papillaud mat sengem Betrib ni zu Lëtzebuerg Fouss faassen.
Dëst sollt sech schnell änneren. De Jos Seyler an de Pierre Papillaud waren sech schnell eens an hunn den 19. Juli 1985 déi Gesellschaft, déi haut ënner dem Numm „Eaux Minérales de Beckerich“ bekannt ass, gegrënnt. Dem Fransous säi „Groupe Alma“, zu dëser Zäit schonn drëttgréisste Waasserfabrikant weltwäit hanner Nestlé an Danone, huet 50 Prozent behalen a gläichzäiteg dräi Kolleegen, déi zwee Fransousen Dominique Sauvalle a Pierre Mignot an den Däitschen Armin Philipp mat an d’Boot bruecht. 15 Prozent sinn an der Hand vun der Gemeng Biekerech bliwwen, an dat ass och nach haut esou.
Direkt am éischte Joer goufen 13 Millioune Fläsche verkaf, dëst ënner der Leedung vun engem ale Bekannten, dem Lucien Bertemes, dee kuerz no der Grënnung vun der Gesellschaft d’Spuerkeess verlooss huet, fir sech zukünfteg ëm d’Geschécker vun der Biekerecher Waasserfabrik ze këmmeren. An och de Camille Gira huet weider eng wichteg Roll an der Geschicht vum Biekerecher Waasser gespillt; hie souz iwwer Joren am Conseil vun der Societéit.
Pro Joer verloosse ronn 200 Millioune Fläschen d’Fabrik zu Biekerech. Allerdéngs droen se net all den Numm vun der Westgemeng. Och d’Marken Ophélie a Cristaline ginn zu Biekerech produzéiert. 90 Prozent vun der Produktioun gëtt a Länner ewéi Frankräich, Däitschland, der Belsch, Holland, England an Irland exportéiert. An trotzdeem bedéngt d’Waasserfabrik 18 Prozent vum Lëtzebuerger Marché vum Drénkwaasser. Mee net nëmmen d’Waasser an de Fläschen ass komplett lëtzebuergesch. Och d’Fläsche fir d’Biekerecher Waasser ginn an der Waasserfabrik hiergestallt. Bei der Produktioun gëtt héije Wäert drop geluecht, d’CO2-Emissiounen, déi duerch d’Schmëlze vum PET-Granulat entstinn, op e Minimum ze reduzéieren. An esouguer d’Maschinnen, op deenen dës Fläsche produzéiert ginn, ginn hei am Land hiergestallt, bei der Firma Husky zu Diddeleng.
Haut gehéiert d’Waasserfabrik zur Biekerecher Gemeng ewéi déi wuelbekannte Millen, déi nëmmen e puer Meter niewent der Waasserfabrik steet. An och d’Millen huet zu hirer Zäit eng Virreiderroll an der Gemengegeschicht gespillt. Am Joer 1912 scho gouf se mat engem Dynamo ekipéiert an huet d’Biekerecher Gemeng mat selwer produzéiertem Stroum versuergt. Domat war Biekerech eng vun den éischte Gemengen am Land, an där et „fléissende“ Stroum gouf.
Hätt de Jos Seyler deemools net esou vehement u senger Iddi festgehalen, géing d’Quellwaasser zu Biekerech warscheinlech och haut nach ëmmer gemittlech de Kuelebierg eroflafen an um Fouss vum Bierg erëm am Buedem versickeren – an d’Spawecken an der Gemengekeess wieren och nach eng Zäit do wunne bliwwen!
En Artikel vum Marc Wilgé
