Säit der Grënnung vum CFC hu bis elo schonn iwwer 250.000 Chaufferen aus 130 verschiddene Länner un de verschiddene Formatiounen deelgeholl. An dëser Statistik sinn awer net nëmmen d’Autosfuerer opgelëscht, mee och nach d’Participantë vun der „Formation professionelle“, also déijéineg, déi eng Ausbildung zum Beruffschauffer maachen.

Fir op déi verschidde Risiken op der Strooss hinzeweisen, bitt de Fuersécherheetszentrum eenzel Deeg oder Eventer un, déi och an Zesummenaarbecht mam Staat organiséiert ginn. Sou gouf op Initiativ vum Transportminister François Bausch de „Fit for your bike“ an d’Liewe geruff. Zesumme mat ënner anerem der Police an dem Automobilsclub soll de Motorradfuerer op déi gewësse Geforen am Stroosseverkéier opmierksam gemaach ginn. „An de leschte Joren hunn dach relativ vill Motorradfuerer hiert Liewe misse loossen. Bei dësen Trainingsübunge gëtt gewisen, wéi een de Risiko erofschrauwe kann“, seet den Direkter. E weidert Beispill war de „Young Drivers Day“. An dëse Workshoppen, déi bis 2017 ugebuede goufen, goung et ënner anerem dorëm, de jonke Participantë vun 18 bis 24 Joer e verantwortungsvollt Behuelen op der Strooss méi no ze bréngen. Tipps gouf et och vu bekannten Autorennfuerer, wéi z. B. engem Jarno Trulli, deen och an der Formel 1 aktiv war.

E Groussdeel vun dëse prakteschen Exercicer gëtt op der Teststreck duerchgefouert, déi direkt niewent dem Gebai vum Fuersécherheetszentrum ass. An à propos Teststreck. Dës Rennpist gehéiert eigentlech guer net dem CFC. Dee lount d’Streck fir seng Zwecker. D’Pist selwer ass scho säit dem 1. Juli 1969 am Besëtz vun der Entreprise Goodyear. Virun ongeféier 50 Joer huet den deemolege Prënz a jëtzege Groussherzog Henri dës Pist als eng zousätzlech Anlag vum „Goodyear Innovation Center Luxembourg“ ageweit. D’Iddi hanner dëser Teststreck war, datt si eng extreem Wichtegkeet fir d’Weiderentwécklung an d’Fuerschung fir de Betrib sollt bréngen. Des Weidere war et déi éischt Streck vu Goodyear, déi baussent den USA gebaut gouf. An deene ville Joren dono goufe verschidden Erweiderungen a Modifikatiounen un der Streck virgeholl. Dësen Ausbau huet et der Firma erméiglecht, méi e grousse Spillraum fir verschidden Tester ze hunn. Sou kënnen hautdesdaags zum Beispill allméiglech Zorte vu Bremstester duerchgefouert ginn, egal op dréchenem oder op naassem Ënnergrond.