D’Beweegungen am Taijiquan bauen ëmmer op dem Prinzip vu Kreesser op. Am Kierper muss eng gewësse Balance bestoen, fir dass d‘Energië richteg fléisse kënnen. „Dat Wichtegst beim Tai-Chi ass d’Beepositioun, dat ass d’Basis vun allem. Et ass e bësse wéi bei engem Bam: wann d’Wuerzele stabil sinn, da kënnen d’Äscht sech am Wand beweegen, ouni hiren Halt ze verléieren“, erkläert de Volker. Tai-Chi ass awer net einfach just d’Ausféiere vun enger astudéierter Choreographie, et ass e Liewensstil. Net nëmmen de Kierper gëtt trainéiert, mee och de Geescht. Sou solle virun allem déi ënnerlech Prinzipie vun der Tiefenentspanung mat der Zäit an den Alldag integréiert ginn, fir esou effektiv wierken ze kënnen.

Wat an der westlecher Kultur vu villen awer einfach just als wëchentlechen Hobby gesi gëtt, gehéiert a China zum alldeegleche Rhythmus. Besonnesch a Groussstied treffen sech Pensionnairen all Moien an ëffentleche Parken, fir zesummen Tai-Chi ze praktizéieren. Och am Yogaloft zu Märel an um Kierchbierg gi reegelméisseg fréi moies Coursen ugebueden, fir esou der Philosophie vum Sport gerecht ze ginn. „Bei eis ass Tai-Chi eng Manéier, fir den Dag unzefänken a seng physesch a psychesch Gesondheet ze erhalen“, erkläert eng vun de Proffen. Tëschent 80 an 90 Prozent vun de chinesesche Senioren notzen de Kampfsport, fir fit ze bleiwen. „Am Weste sinn al Leit oft hëlleflos a gleewe guer net, dass een sech selwer heele kann. Dat ass traureg. A China sinn et d’Grousselteren, déi sech de ganzen Dag iwwer ëm d’Enkelkanner këmmeren, do muss ee kierperlech a Form sinn an dat geet mat Tai-Chi“, sou déi gebuere Chinesin. Hire Cours fänkt si mat Meditatioun un, hei soll déi ënnerlech Linn fonnt ginn, déi de Kierper vu Kapp bis Fouss matenee verbënnt a sou d’Energie fléisse léisst. Duerno geet et weider mat den Exercicen „24“ an „Eight pieces of silk“, béid gängeg Übungen am traditionelle Yang-Stil. D’Beweegunge sinn alles Ugrëffs- a Verdeedegungsmouvementer, déi op eng duuss Manéier d’Gelenker an Organer deblockéieren.