D’Experiment vun der internationaler europäescher Schoul war also e groussen Erfolleg. Esou grouss, datt net nëmmen hei zu Lëtzebuerg Europaschoule gebaut goufen, mee quasi iwwerall, wou et gréisser Europäesch Institutioune ginn. Mëttlerweil ginn et nach weider fënnef Europaschoulen an der Belsch, véier dovun zu Bréissel an eng zu Mol, dräi an Däitschland zu Frankfurt, Karlsruhe a München, eng an Italien zu Varese, eng weider an Holland zu Bergen an eng a Spuenien zu Alicante.

Dobäi kennt nach eng Villzuel vun akkreditéierte Schoulen, also Schoulen, déi als Europaschoulen unerkannt ginn. Dofir gëtt als éischt gekuckt, ob d’Coursen an den Erzéiungsmodell dem Standard, dee vun der Europaschoul festgeluecht gëtt, entspriechen. Esou huet Lëtzebuerg zum Beispill niewent den zwou offiziellen Europaschoulen nach sechs weider unerkannte Schoulen. Dozou gehéiert och déi leschten Additioun, d’École internationale Gaston Thorn, déi am September 2022 hir Dieren opgemaach huet. Insgesamt ginn et 24 akkreditéiert Schoulen an Europa, ausserdeem nach zwou, déi nach op hir Akkreditéierung waarden.

Eng vun de Saachen, déi d’Europaschoulen esou speziell maachen, ass, datt hei net nëmmen op Däitsch, Franséisch oder Englesch ënnerriicht gëtt, mee och op Finnesch, Litauesch, Hollännesch, Polnesch, Portugisesch, Schweedesch a Spuenesch. Ausserdeem bitt d’Europaschoul och nach Coursen ouni Sproochesektioun op Bulgaresch, Estnesch a Lettesch un. Jee nodeem, wat engem seng Mammesprooch ass, gëtt een dann an d’Europaschoul I oder II geschéckt. Nieft de Sprooche ginn natierlech och Mathé, Natur- an Humanwëssenschafte geléiert. Dobäi kënnt Sport an d’Fuerdere vun der Kreativitéit duerch Musek a Konscht.