Menu
Menu
Menu
Hie war Kënschtler, Designer, Editeur, Computerpionéier, Reklammsmécher, dat schlecht Gewësse vu senger Stad, onkonventionell, konservativ. Zwou Saache waren him besonnesch wichteg: d’Lëtzebuerger Musel a seng Heemechtsstad Gréiwemaacher. Fir béid huet hie villes gemaach an iwwer béid konnt hie sech ganz fuerchtbar opreegen.
Et konnt een e liicht ënnerschätzen, dobäi hat hien d’Konschtakademien zu Düsseldorf a Bréissel besicht, an deen een oder anere Präis gewonnen. Awer am Gréiwemaacher vun den 1980er war hien deen Typ, deen nach um hallwer zwielef d’Dier am Buedmantel opgemaach huet, wann een e Grafiker gebraucht huet.
Och wann et ewéi eng Banalitéit kléngt, d’Musel, a virun allem d’Stad Gréiwemaacher, sinn zanter dem 22. Mee 2020 e gutt Stéck méi aarm. Mam Usch (Eugène) Burton ass e Mann gestuerwen, deen d’Queeschdenken oder och d’Géint-de-Stroum-Schwammen zu senger Passioun gemaach hat.
De Geistesblitz, der Musel véierzeg Joer nom Enn vum Krich erëm eng eegen Zeitung, an domat de regionale Butteker e Medium, ze ginn, huet gezünt. D’Muselzeidung ass en Erfollegsprojet, deen zanter méi ewéi véier Joerzéngten zur Musel gehéiert. Wat mat enger elektrescher Schreifmaschinn ugefaang huet, gouf kuerz drop, mat enger klenger Këscht mam Numm Macintosh, zum technologesche Virreider vun der moderner Zeitungsproduktioun. Ëm 1990 sinn all déi Kreativ aus dem Ländchen op Gréiwemaacher gepilgert, fir sech unzekucken, ewéi d’Zukunft ausgesäit. Zu Gréiwemaacher hat keen eng Anung, wat fir innovativ Weeër an der aler Villa niewent der Post ageschloe goufen.
Dobausse gouf d’Muselzeidung gutt opgeholl, heiansdo gouf et awer och Kaméidi. Zum Beispill wéinst deem legendären Titelbild vun engem ofgestierzte Sprëtz-Helikopter mat der passender Schlagzeil „Schädlingsbekämpfung“ ‒ Joerzéngte virun all Öko-Diskussioun an der Landwirtschaft. D’Quittung ass den Usch sech direkt vis-à-vis „beim Jules“, der Betribskantin vun der Muselzeidung a Burton-Design, siche gaang; d’Comptoiresdiskussioun bei engem Elbling war him helleg. Sträitkultur „at its best“. De spéideren Ofrëss vum Café huet hien op d’mannst esou getraff ewéi den Ënnergang vu senger Liblingsautosmark Saab.
Am Januar 1991 hunn ech ugefaange bei Burton-Design, dem Usch senger Publicitéitsagence, ze schaffen, ze schreiwen an d’Produktioun ze organiséieren. Déi kommerziell getrennte Muselzeidung war als Gratiszeitung fir mech e Schmuddelkand. Gratiszeitung? Eemol dragekuckt an dann de Fësch dran agewéckelt. Eng krass Feelaschätzung mengersäits, well dat geniaalt um Usch senger Muselzeidung war den Inhalt: Biller, Biller, Biller. Biller vun Aweiungen, Fester, Gebuertsdeeg, offiziellen oder familiäre Feieren. Eng simpel an einfach Iddi, déi dës kleng Gratiszeitung geschwënn zum Medium vun der Musel, op béide Säite vum Floss, gemaach huet. Jiddweree wollt dra sinn a jiddwereen huet dës Zeitung vum Mount am A4-Format (och esou eng Usch-Iddi: „Déi Gréisst kann ee gutt op der Toilette liesen.“) vu vir bis hanne gelies, op der Sich no deem enge Bild. D’Geschäftsleit hu merci gesot a sëlleg Annoncë geschalt. Zanter méi ewéi véier Joerzéngten.
Och d’Agence gouf Usch-méisseg gefouert. Mat knaschteger Freed huet den Usch iergendwann an den 1990er de Lëtzebuerger Superkreativen eng ferm Nidderlag bereet. Enges Daags huet hien de lëtzebuergesche Publikumspräis gewonnen. All déi duerchgestylten Héichglanzannoncen hat hie mat enger einfacher, zweefaarweger Annonce vun enger grousser Versécherung geschloen. D’Geheimnis vum Erfolleg: Den Text war op Lëtzebuergesch.
Am Wandschiet vun der Muselzeidung huet Burton-Design jorelaang fir Banken an Institutiounen, ënner anerem fir den deemolegen ONT, an ënnerschiddlech Ministèrë geschafft. Awer am Fong ass déi ganz Aarbecht just gemaach ginn, fir technesch ëmmer um neiste Stand ze sinn. Déi éischt Digitalkameraen, déi neiste Macen aus den USA, all déi nei Generatioune vu Programmer a Späichermedien an déi éischt Groussformat-Plottere mat Fotoqualitéit hunn hire Wee op d’Musel fonnt. Dem Usch säi Kommentar zu der éischter Daten-CD: „Do passt dat ganzt Liewe vun enger Sekretärin drop.“ Nei Computeren aus den USA sinn och schonn emol bei der Däiwel gefuer, wa beim éischte Kontakt mam lëtzebuergesche Stroumnetz d’Banneliewe vun den Apparater, déi fir 110 Volt ausgeluecht waren, an Damp opgaangen ass. Den Usch huet mat de Schëllere gezuckt. Kommerziell huet ëmmer seng Fra Sett de Buttek zesummegehalen.
No schwéierer Krankheet an enger Kris an der Publicitéitsbranche, huet sech vun 2002 un alles op d’Muselzeidung an hir kleng Schwëster, d’Sauerzeidung, konzentréiert. Mëttlerweil woussten d’Miseler awer wie si haten, een dee queeschgeduecht huet an ugeeckt ass, awer d’Muselgéigend ëmmer am Bléck hat ‒ woubäi d’Verbreedungsgebitt vun der Muselzeidung mat iwwer 50.000 Stéit haut bis virun d’Diere vun der Haaptstad reecht. Nodeems ech 2002/2003 bei de Journal gewiesselt sinn, hu mir eis reegelméisseg bei Rendez-vousen op der Musel gesinn a sinn och anescht a Kontakt bliwwen. Ech hunn nach eng ganz aner Säit vum Usch Burton kennegeléiert, déi hie soss ganz gutt verstoppt huet, warscheinlech wéinst de Comptoirsdiskussiounen an dem „dem Vollek op d’Schnëss kucken“: den Usch, de Bildungsbierger. Hunn ech mol erëm een ze iwwerspëtzte Kommentar geschriwwen, koum den nächsten Dag eng SMS. Mat engem Kommentar zum Kommentar. Ech hätt et eigentlech misse wëssen, well trotz all der zur Schau gestallter „Bohème“ huet e seng Kanner zur Bildung ugedriwwen, mat Erfolleg. De Ben ass haut Medezinner an d’Tess Burton, déi haiteg Patronne vun der Muselzeidung, gouf 2013 déi jéngst Deputéiert an der Chamber. Et ass schued, datt den Usch Burton am Alter vun nëmmen 69 Joer gestuerwen ass.
E Réckbléck vum Patrick Welter
1950: Den Usch Burton – e Maacher Jong, deen den 11. Juli 1950 op d’Welt kënnt a säi ganzt Liewe gäre sollt zu Maacher verbréngen.
1969: No der Primärschoul zu Maacher geet hien op Iechternach an de Kolléisch a mécht do seng Première latine.
1970: Et zitt hien dono op Bréissel an op Düsseldorf, wou hie Grafikdesign studéiert.
1974: Den Usch grënnt seng eege Publicitéitsagence zu Gréiwemaacher. Hie gëtt mat Präisser ausgezeechent.
1975: Den Usch moolt de Frou-Frou-Männchen, deen haut nach d’Maskottche vum Tennis-Club Gréiwemaacher ass.
1980: Scho fréi ass den Usch ëmmer mat sengem Fotoapparat ënnerwee.
1981: Den Usch bestit sech mam Setty Kongs.
1981: Am Dezember 1981 bréngt den Usch déi éischt Muselzeidung eraus.
1982: Säi Jong de Ben, deen haut als Dokter schafft, kënnt op d’Welt.
1985: Um Dag vun der Gebuert vu senger Duechter Tess keeft den Usch sech deen éischte Macintosh-Computer vun Apple. Kuerz drop gëtt d’Muselzeidung komplett um Computer produzéiert an ass domat déi éischt Zeitung weltwäit, déi op engem Computer produzéiert gëtt.
1985: Säi Meedchen d’Tess, dat haut d’Musel- an d’Sauerzeidung an der 2. Generatioun weiderféiert a säit 2013 Deputeiert ass, gëtt gebuer.
1989: Dem Usch seng éischt Zeitung fir d’Regioun Iechternach kënnt 1989 eraus. Fir d’éischt huet d’Zeitung Fair-Play geheescht …
1990: … a vun 1990 un huet se du Sauerzeidung geheescht.
2002: Ëmmer erëm huet den Usch gäre mat verschiddene Sujeten a sengen Zeitunge provozéiert, an dat esouguer op der Titelsäit. E war domat der Zäit ëmmer viraus.
2007: D’Erfollegsstory Muselzeidung feiert 25 Joer.
2012: Den Usch ass ëmmer mam Fotoapparat ënnerwee, entweeder um Buedem bei de Leit oder an der Loft, fir d’Landschaften ze knipsen.
2012: D’Muselzeidung feiert 30 Joer. Dëst ass de Start fir d’Verdeelung a Frankräich, an domat gëtt d’Muselzeidung zu enger europäescher Zeitung, déi 3 Länner matenee verbënnt.
2014: Den Usch bréngt eng nei Oplo vum Frantz Seimetz sengem Feuersalamander eraus.
2017: Den Usch gëtt Grousspapp. Seng Enkelin Finny kënnt op d’Welt.
2020: Den Usch hätt 70 Joer kritt …
2020/2021: … a seng Zeitunge feieren och ronn Gebuertsdeeg. D’Sauerzeidung feiert am Dezember 2020 30 Joer an d’Muselzeidung am Dezember 2021 40 Joer.
