Net nëmmen op lokaler Basis, mee op internationalem Niveau organiséiert d’Raiffeisen schonn zanter e puer Joerzéngten e Molconcours fir Schoulklassen a Kanner vu verschiddenen Altersgruppen tëschent 4 a 17 Joer. Am Duerchschnëtt maachen eleng zu Lëtzebuerg eng 150 Schoulen a Lycéeën all Joer beim Molconcours mat. Et sinn esouwuel national wéi och international ëffentlech a privat Schoulen a Lycéeë vu Lëtzebuerg, déi matmaachen. De Concours, deen heizuland ënnert dem Patronage vum Educatiounsminister steet, ass e flott Beispill fir d’Fërdere vun der Kreativitéit an der Diversitéit vun de Kanner hirer Fantasie. Op internationalem Niveau loosse jonk Kënschtler aus Lëtzebuerg, Däitschland, Éisträich, der Schwäiz, Frankräich an Italien hirer Fantasie fräie Laf a bréngen hir Iddien a Gedanke faarflech zu Pabeier.

Ob Zeechnung, Molerei, Collage, Comicstrip oder Aquarell, schwaarzwäiss oder faarweg, ob mat Bläistëftsfaarwen oder Wuessstëfter, all Technike sinn erlaabt, well de Concours huet am Laf vun de Joren evoluéiert an akzeptéiert haut souguer och déi digital Ausdrocksforme wéi zum Beispill Montagen am Photoshop um Computer. Eenzeg an eleng dat kreatiivt Schaffen ass erlaabt, verbuede sinn natierlech Kopië vun anere Wierker.

E Jury bewäert d’Biller no verschiddene Krittären an der jeeweileger Alterskategorie. De Jury setzt sech zesummen aus Léierpersonal, lokalen Artisten, enger Persoun vum Educatiounsministère an och engem Mataarbechter vun der Raiffeisen. Déi national Gewënner ginn da vun engem internationale Jury bewäert, deen aus Vertrieder vu kooperative Banken aus sechs verschiddene Länner (Frankräich, Däitschland, Italien, Schwäiz, Éisträich a Lëtzebuerg) zesummegestallt gëtt. Dësen „Internationale kreative Jugendwettbewerb“ stoung och schonn am Guinness-Buch vun de Rekorder als gréisste Molconcours vun der Welt.