An enger Zäit, wou eng nei Well vun Nationalbewosstsinn hei zu Lëtzebuerg stattfënnt, an d‘Affäre ronderëm de Bommeleeër nach ëmmer an de Käpp vun de Leit hänkt, trëfft de Superjhemp den Nerv vun der Zäit. »De Superjhemp war am Fong eng Commande vun der „Revue“. Nom Succès vun eiser éischter BD, dem „Pechert” an der Gratiszeitung WEEKEND, wollt d‘Revue eng richteg, faarweg BD vun eis, also vum Roger Leiner a vu mir. De Superjhemp ass dunn an engem Owend entstane, ganz einfach, well mir allen zwee scho laang, an dat onofhängeg vuneneen, d’Iddi fir e Lëtzebuerger Superheld haten. A well de Bommeleeër deemools, genee wéi haut, aktuell war, war den Thema vum éischten Album séier fonnt!« erzielt eis de Lucien Czuga.

De Superjhemp ass eng Karikatur vun den amerikanesche Superhelden aus den 30er-Joren, allerdéngs spillen d‘Geschichten, déi hien erlieft, am Haut an Hei.

Genee wéi säi berüümtent Virbild aus den USA ass de Superjhemp, alias Charel Kuddel, am ziville Liewen e braven a ugepasste Familljepapp, schafft (mol méi, mol manner) als Sous-chef de bureau, 1er en rang am Ministär fir ongeléiste Problemer, kuerz M.O.P., am Service vun den hoffnungslose Fäll. Ideal, fir als Superheld net ze vill opzefalen!

A sengen Aventurë begéinen dem Superjhemp, begleet vum Inspekter Schrobiltgen, dem Kommissär Harespel, der Joffer Lamesch, dem Hond Bernie an nach villen anere flotte Characteren, op all Eck an Enn Karikature vu bekannte Lëtzebuerger Perséinlechkeeten. Och aktuell lëtzebuergesch an international Ereegnesser gi mat groussem Genoss vum Lucien Czuga an dem Roger Leiner an de Superjhemp-Albume verschafft an deels ferm op d‘Schëpp geholl. De Lieser entdeckt op all Säit, jo praktesch an all Bild erëm flott, kleng a witzeg Detailer, a sief et nëmmen en Dëppche vum bekannte Kachkéis vun der Juxlait. Dëse Kachkéis gëtt och dem Superjhemp seng Kraaft a gëtt an den Albumen an alle méiglechen an onméigleche Situatiounen agesat, an ass och praktesch fir alles ze gebrauchen: Fangnetz, Superpech, Zündschnouerläschmëttel, jee, d‘Fantasie vun den Auteure kennt (bal) keng Grenzen.

E weideren „Running Geck“ sinn déi sëllegen zerbrache Fënsteren, déi de Superjhemp am Laf vun de Geschichten hannerléisst. De Staatsbudget vum Groussdiktator Jottzéjott (och hei ass de Glach mat engem fréiere Lëtzebuerger Minister rengen Zoufall) leit ganz ferm dorënner.

All Ära huet hiert Enn, leider och déi vum Superjhemp. Nom Doud vum beléiften Zeechner Roger Leiner stellen d‘Fans sech d‘Fro, ob a wéi et mam Superjhemp weidergeet.

Lucien Czuga: Op d’Fro no engem eventuellen nächsten Album vum Superjhemp äntweren ech ëmmer (opgepasst, Humor!!!): Soulaang, wéi de Roger Leiner dout ass, wäert et keen Album vum Superjhemp méi ginn!

En Artikel vum Marc Wilgé