Ëm 2009 huet hien ugefaangen, E-Maile mat Wiederprevisiounen un d’Famill ze schécken. „Meng Elteren hu gemengt, dat wär just eng Phas a géif gläich ophalen“, erzielt de Philippe Ernzer am Gespréich mam Konterbont. Mee do hate seng Eltere sech wuel geiert.
Am Dezember 2010 huet hien am Alter vun 12 Joer Facebook fir sech entdeckt. „Do ass alles lassgaangen“, seet hien. Seng Reechwäit war awer nach zimmlech bescheide bis de 6. Juli 2014. Deen Dag ass eppes geschitt, wat Météo Boulaide schlagaarteg an nohalteg sollt veränneren. Et war den Dag vun der Foire agricole zu Ettelbréck, op där ronn 10.000 Visiteuren erwaart goufen. E staarkt Donnerwieder sollt iwwer Lëtzebuerg a ganz spezifesch iwwer d’Foire agricole zéien. De Philippe Ernzer hat d’Situatioun richteg ageschat a scho moies virgewarnt. „Meteolux, de staatleche Wiederdéngscht zu Lëtzebuerg, hat sech awer réischt vill méi spéit entscheet, eng Warnung erauszeginn“, erkläert hien.
D’Donnerwieder ass deen Dag genee esou iwwer Lëtzebuerg gezunn, wéi de Philippe Ernzer dat op senger Kaart duergestallt hat. Dobäi huet hien deemools vill manner Analyse konnte maachen ewéi haut. Den Treffer vum jonken an nach relativ onbekannte Wiederfräsch ass duerch sämtlech Medie gaangen. „Ech war dat net gewinnt, esou am Mëttelpunkt ze stoen, a war domadder zimmlech iwwerfuerdert“, erënnert hie sech.
Séier huet hie gemierkt, datt dat, wat hie mécht, eppes ass, wat de Leit gefält. Gläichzäiteg ass him bewosst ginn, datt dat awer och mat enger enormer Verantwortung verbonnen ass. „Ech hu mer ab deem Dag virgeholl, mech nach méi eranzeknéien, well ech meng Aarbecht bis dohinner éischter als Hobby gesinn hunn.“ Hie wollt deem gerecht ginn, wat d’Leit vun him verlaangen, an huet sech weider professionaliséiert.
De Philippe Ernzer bezeechent sech selwer als Autodidakt, also een, dee sech Wëssen eegestänneg uneegent. Als Kand huet hie sech ganz vill Dokumentatiounen um Discovery-Channel, op Arte oder DMAX ugekuckt. Hie war faszinéiert vum Sonnesystem, dem Weltall an de Satellitten. „Ech hu realiséiert, wéi schéin d’Äerd vun uewen ass mat hire Wolleken.“ Aus Kartrongskëschten huet hien deemools Satellitten nogebaut. An enger Doku huet hien dunn en Hurrikan vun uewe gesinn. Dat huet hien esou begeeschtert, datt en alles wollt doriwwer wëssen. „Wann ech eppes gesinn, wat mech faszinéiert, muss ech direkt alles doriwwer wëssen, an zwar am léifsten an dräi Sekonnen.“
Vun den Hurrikaner ass hien op d’Tornadoe komm. „Dës hu mir dunn definitiv d’Dier an d’Welt vun der Meteorologie opgemaach.“ Hien erënnert sech un eng Dokumentatiounsserie vun deemools, déi sech Storm Chasers genannt huet. „Do sinn se mat gepanzerten Autoen an d’Tornadoen eragefuer an hunn do Sensoren opgestallt, fir Miessungen ze maachen. Dat hat mech esou faszinéiert, datt ech do voll drageklomme sinn a bis haut net méi erauskomm sinn.“
De Philippe Ernzer bestätegt, datt bei de Wiedere virun engem Joer Enn Mee zu Miersch (Essen) respektiv Enn Juni zu Biisse jeeweils en Tornado um Wierk war. Well dëst vun offizieller Säit ugezweifelt gouf an nach ëmmer gëtt, war de Philippe no dësen Tornadoen op den Terrain gefuer an huet Analyse gemaach. Wéint dësen ënnerschiddlechen Usiichte war d’lescht Joer dunn och en heftege Sträit tëschent dem jonke Meteorolog an dem staatlechen Déngscht Meteolux ausgebrach.
Säit e puer Joer schafft de Philippe Ernzer mat sengem Associé Criss Steichen zesummen, deen ironescherweis mol kuerz Meteorologie studéiert hat, dunn awer séier gemierkt huet, datt dat näischt fir hie wier. „Mee de Criss interesséiert sech trotzdeem fir d’Meteo, huet awer aner Stäerkten, déi hie fir déi am Juli 2022 gegrënnte Firma Clearsky Solutions SARL-S asetzt“, erkläert de Philippe Ernzer. „De Criss mécht de Marketing, zitt Clienten u Land an hëlleft mir, Grafike fir eis Meteo opzesetzen.“ D’Meteoprevisiounen an d’Erklärungen dozou mécht awer ausschliisslech de Philippe Ernzer. „Mir ergänzen eis perfekt“.
Am Februar 2024 ergräifen déi zwee eng interessant Geleeënheet a plënnere fir d’éischte Kéier an e Büro eran. Obwuel Météo Boulaide den Numm vun der Uertschaft huet, an där de Philippe Ernzer opgewuess ass – op Lëtzebuergesch heescht d’Duerf Bauschelt – befënnt sech de Firmesëtz a Studio elo am déiwe Süden, nämlech am Creative Hub 1535 zu Déifferdeng. „Clearsky ass iwwregens e bësse wéi d’Reklamme-Regie fir Météo Boulaide, sou wéi eben IP d’Reklamme-Regie fir RTL ass“, erkläert de Philippe Ernzer.
Säit e puer Joer huet hien eng Sendung um radio 100,7, wou hien den Nolauschterer d’Wieder erkläert. Net nëmme wéi d’Wieder gëtt, mee och firwat dat esou ass. Neierdéngs bedreift Météo Boulaide och d’Wiedersäit am Tageblatt. Fir den Daachverband vun de Campingplazbesëtzer Camprilux huet de Philippe Ernzer e Virwarnsystem entwéckelt, deen d’Camper virun extreemen Naturphenomeener warne soll. Och verschidde Festivalle kafen d’Déngschter vu Météo Boulaide, fir d’Leit am Fall vun engem Wieder rechtzäiteg ze warnen.
D’Zäite waren awer net ëmmer esou roseg fir Météo Boulaide. Éier Clearsky Solutions gegrënnt gouf, hat de Philippe Ernzer eng aner Firma zesumme mat engem aneren Associé. „Dësen huet d’Firma erofgewirtschaft an doduerch wichteg Projete blockéiert, ënner anerem Updates fir d’Meteo-App“, erzielt eis de jonke Meteorolog. „Dat war eng extreem Down-Phas a mengem Liewen.“ Well hien negativ Repercussiounen op säi Meteo-Déngscht gefaart huet, huet de Philippe Ernzer dëst bis elo net an der Ëffentlechkeet bekannt gemaach. „Elo, wou dëse Spuk eriwwer ass, sollen d’Leit dat roueg gewuer ginn“, seet hien.
Ufanks Juni ass dunn endlech seng nei App erauskomm, mat engem wichtege Feature, dem Skywatch. Hei kann een op enger Kaart novollzéien, wou sech beispillsweis Donnerwiedere forméieren a wou se hinzéien. Well keen esou e Feature entwéckele konnt, huet de Philippe dat eebe selwer gemaach. Elo, zwee Joer méi spéit, ass alles operationell. „Dat war e ganz wichtege Schrëtt fir Météo Boulaide“, stellt de Philippe erliichtert fest. Domadder ass säi private Meteo-Déngscht gutt fir d’Zukunft opgestallt.
En Artikel vum Eric Rings