Dir braucht (fir véier Persounen):

• 4 Dindefilete mat Haut
• 10 Salbeiblieder
• en Thermomix (fir de Gewierzpâté)

Maiskuch:

• 200 g Polenta/Maisschmull
• ½ l Mëllech, 50 g Parmesan
• 2 cl Olivenueleg, 30 g Botter
• Salz, Peffer, Muskot

Gewierzpâté:

• 1 Päckelche Bliederdeeg
• 1 Läffel Arganueleg
• 1 ongesprëtzten Orangeschuel
• Stärenanäispolver, Kanéilpolver, Séissholzpolver
• Tonkapolver
• 10 g Zocker
• 50 g gréng Pistaschen
• 1 cl Pistaschenueleg

Garnitur

• 2 chineesesch Pak-Choi-Kabeskäpp
• 100 g kleng Champignonen
• 4 frësch Aprikosen
• 1 Bond Zitrounewerbeen

Zooss:

• 2 dl bronge Bouillon vum Poulet
• 1 dl Martini Rosso
• e puer Drëpsen Angostura
• 1 ongesprëtzten Orange
• 100 g Chrëschtgebeess

Pärelhong

D’Dinden op der Hautsäit ubroden, salzen, pefferen a mat de Salbeiblieder an eng Vakuumtut stiechen. Zwou Stonne bei 60 Grad an den Uewe stellen.

Maiskuch

D’Mëllech mam Olivenueleg un d’Kache bréngen. Parmesan, Salz, Peffer a Muskot derbäimaachen a mat engem Holzläffel mam Maisschmull verréieren. Zéng Minutten ënner permanentem Réiere kachen. De Botter ënnermëschen an d’Mass dann an enger klenger Form bis op d’Héicht vun annerhallwem Zentimeter verdeelen. Ofkille loossen. De Kuch a Stécker vu siwe mol dräi Zentimeter ausstiechen. Béidsäiteg broden an op e Bakblech leeën. Fënnef Minutte bei 160 Grad an den Uewe stellen.

Gewierzpâté

All Gewierzer, den Zocker an déi geriwwen Orangeschuel vermëschen. Bliederdeeg zu Rechtecke vu siwe mol véier Zentimeter schneiden. Mat engem Pinsel all Stéck Deeg mat Arganueleg besträichen, mat der Gewierz-Zocker-Mëschung bestreeën an an tëschtent zwee Bakblecher am Uewe baken. Dréche stellen. Pistaschen an Ueleg am Thermomix bei 80 Grad, Stäerkt néng, dréie loossen, fir datt e renge Püree entsteet. An enger Doséierfläsch op d’Säit stellen.

Garnitur

Déi gesalzten a gepeffert Champignone botzen a broden, duerno op d’Säit stellen. D’Aprikosen a véier schneiden, mat Zocker a Kanéil mëschen an eng Stonn bei 75 Grad am Uewen zéie loossen.

500 Gramm vun de gebakenen Aprikosen eraushuelen a mat der Zitrounewerbeen am Mixer püréieren. An enger Doséierfläsch op d’Säit stellen. Déi chineesesch Kabeskäpp wäschen a pochéieren, dann ofkille loossen. Gutt ofdrëpse loossen an am Botter broden. D’Maiskuchen huelen, Kabesblieder ëm hire Still wéckelen an op d’Kuche leeën, duerno e Läffel Champignonen an dräi Aprikosestécker drop presentéieren a mat Frischhaltefolie zoudecken. Virum Garnéieren aacht Minutte bei 75 Grad an den Uewe stellen.

Zooss

De Bouillon vum Poulet, de Martini, den Angostura an déi a véier geschnidden Orangen an eng Kasseroll maachen, op d’Hallschecht reduzéieren, duerch e renge Sift passéieren, ofschmaachen an d’Konsistenz préiwen. D’Gebeess an e Bond Salbei derbäimaachen, d’Kasseroll zoudecken an op d’mannst eng Stonn zéie loossen.

Fäerdegstellen a Presentéieren

Op engem flaachen Teller e Krees mam Aprikosepüree zeechnen an an d’Mëtt dovun e Maiskuch mat Garnitur leeën. Dann en Dindefilet an e Läffel Zooss iwwer e bësse Püree derbäimaachen. Mam Gewierzpâté an engem Strauch Ananassalbei oder Äerdbierspinat ofschléissen.