Net manner wéi fënnefmol huet e Lëtzebuerger den Tour de France gewonnen, de François Faber am Joer 1909, den Nicolas Frantz an de Joren 1927 an 1928, de Charly Gaul 1958 an den Andy Schleck 2010. Wat ass eigentlech no hirer aktiver Zäit aus dësen onvergiessleche Vainqueure ginn? – E Gespréich mam Henri Bressler, Auteur vun enger zweebänneger Geschicht vum Lëtzebuerger Vëlosport a vun diverse Sportlerbiographien, ënner anerem iwwer de François Faber, den Nic. Frantz, de Charly Gaul an den Acacio da Silva.

Här Bressler, wat hunn déi lëtzebuergesch Tour-de-France-Victoirë fir d’Land a fir d’Sportler selwer bedeit?

Henri Bressler: Virun allem hate se allkéiers e groussen Impakt op d’Zuel vun de Lëtzebuerger Nowuesscoureuren. Jonk Leit sinn doduerch encouragéiert ginn, fir sech och hanner de Guidon ze klemmen an hire Virbiller nozeäiferen. Dat ass iwwregens en Effet, deen och nach an eiser Zäit ze gesinn ass – no der Victoire vum Andy Schleck sinn eng Hellewull nei Talenter opgetaucht, déi mat impressionnante Leeschtungen iwwerzeege konnten a kënnen. Wat déi lëtzebuergesch Tour-de-France-Gewënner selwer ugeet: De François Faber (1887-1915) huet sech vu sengem Präisgeld en Auto kaf, wat ufanks vum leschte Joerhonnert eng kleng Sensatioun war. Laang konnt hie säin Erfolleg awer leider net genéissen: Well dem Faber säi Papp Lëtzebuerger war a seng Mamm Franséisin, hat hie sech, wéi hie volljäreg ginn ass, fir déi lëtzebuergesch Nationalitéit entscheet, dat virun allem, fir net an d’franséisch Arméi agezunn ze ginn. Wéi den Éischte Weltkrich ausgebrach ass, huet hien sech dunn awer spontan fräiwëlleg an déi franséisch Friemelegioun gemellt an ass schonn ee Joer duerno an der Schluecht gefall. Bedeitend besser ass dem Nicolas Frantz (1899-1985) säi weidere Liewenswee verlaf. Hien huet zu Mamer e Vëlosgeschäft opgemaach, dat séier méi grouss ginn ass. Haut ass doraus e klenge private Musée iwwer dëse bedeitende Sportler ginn, dee vu senger Duechter Nicole an hirem Mann Léon Letsch ageriicht gouf.