D’Iddi vun enger Fussballschoul ass och genau zum richtege Moment komm. Deemools hat d’Nationalekipp nämlech Schwieregkeete sech an der Welt vum Profifussball ze beweisen. Et goufen net genuch Nowuesspiller, déi op dem gefuerderten Niveau gespillt hunn. Vu datt d’Fussballschoul hei awer landeswäit funktionéiert an net un en eenzele Veräi gebonnen ass, konnten a kënnen och haut nach déi beschte Spiller aus Lëtzebuerg erausgepickt a weidergebilt ginn.

Den Tri fänkt och schonn zimmlech fréi un. Ab 8 Joer kann een als gudde Spiller „gescout“ ginn a fir en Testtraining an d’Fussballschoul ageluede ginn. Sollt een den Testtraining bestoen, kann ee sech freeën, well et ass een dem Dram vum Profifussballer e Stéckche méi no komm.

Dee schwéiersten Deel kënnt awer nach, well den Training an den Zäitopwand ass net ze ënnerschätzen. Quasi all Dag heescht et fir d’Schüler, sech no der Schoul fir den Training op Monnerech ze deplacéieren. Dofir ginn et mëttlerweil Navetten, déi d’Spiller uechter d’Land siche fueren.

Um Training selwer gëtt da gekuckt, wat den individuelle Spiller brauch a wéi e sech verbessere kann. An dorop gëtt dann opgebaut. Mee et gëtt net nëmmen un der Fussballtechnik gefeilt, mee och um Zesummenhalt an der Disziplin, déi enorm wichteg fir e Gruppesport ass, gëtt geschafft. Da kennt et och alt emol fir, dass een net mat de Kolleegen eraus ka goen, oder sech doheem entspane kann, well ee vu méindes bis donneschdes Training an der Fussballschoul huet, a weekends spillt een da fir den eegene Veräin. An et kommen dann och nach Testmatcher dobäi, fir déi jonk Sportler un de Rhythmus vum Profifussball ze gewinnen.