Bis elo huet et d’Kulturfans ëmmer an d’Haaptstad gezunn. Dat soll sech elo änneren. Esch2022 ass fir Esch e Sprangbriet. Um Programm stinn Theater, Ausstellungen, Danz, Performancen, Workshoppen an digital Konscht – mat verschiddene Schwéierpunkten an de bedeelegten Uerter: Zu Lëtzebuerg sinn eelef Gemengen an a Frankräich aacht Gemenge mat am Ganze ronn 200.000 Awunner u Bord.

Fir Frankräich sinn dat d’Gemenge vun der Communauté de Communes du Pays Val d’Alzette (CCPHVA): Aumetz, Audun-le-Tiche, Boulange, Ottange, Rédange, Russange, Thil a Villerupt.

Awer net nëmme fir d’Kulturhaaptstad 2022 schaffen d’Gemengen an der Grenzregioun hei zesummen. Scho méi laang gëtt et eng Aarbechtsgrupp „Kultur“, déi et als Zil huet, de Räichtum an d’Vilfalt vun der Kultur an der Groussregioun ervirzehiewen esouwéi de grenziwwerschreidenden Dialog tëschent de Kulturschafenden um Niveau vun der Groussregioun ze stäerken an ze strukturéieren.

Dofir ginn et hei méi Aarbechtsberäicher:

• Gemeinsam Orientéierungen, fir kulturpolitesch Moossnamen an der Groussregioun ze erschaffen;
• D’Fërderung vun der Mobilitéit vum Publikum, vun de Wierker an de Kulturschafenden;
• D’Entwécklung an d’Begleedung vu Projeten an d’Professionaliséiere vu grenziwwerschreidende Kulturnetzwierker.

D’Aarbechtsgrupp „Kultur“ setzt sech zesummen aus der Région Grand Est, der Direction régionale des affaires culturelles (DRAC) an den Departementer Meuse, Meurthe-et-Moselle a Moselle, dem Ministerium für Bildung und Kultur des Saarlandes, dem Ministerium für Familie, Frauen, Kultur und Integration Rheinland-Pfalz, dem Ministerium der Deutschsprachigen Gemeinschaft Belgiens, der Administration Générale de la Culture de la Fédération Wallonie-Bruxelles an dem Lëtzebuerger Kulturministère.

De Virsëtz vun der Aarbechtsgrupp Kultur rotéiert a gëtt vun engem vun de Membere fir zwee Joer iwwerholl. 2021-2022 huet d’Région Grand Est an Zesummenaarbecht mat deenen anere Membere vun der franséischer Deelregioun de Virsëtz.