Mëtt vun den 30er-Joren ass d’Haaptschëff vun der Kathedral vergréissert, en neit Klackespill mat am Ganze 37 Klacken installéiert an niewent dem Haapttuerm, deen op dësem Karfreideg am Joer 1985 verbrenne sollt, en zweeten Tuerm héichgezu ginn. De Brand am Joer 1985 war awer net déi éischt Katastroph, déi dësen Tuerm matmaache sollt. Schonn am Zweete Weltkrich 1945 war d’Spëtzt vum Tuerm duerch e Volltreffer vun der däitscher Arméi zerstéiert ginn.

Géint Véirel vir zwou de 5. Abrëll 1985 koumen d’Aarbechter, déi fir Léit- a Schweessaarbechten am Tuerm engagéiert gi waren, aus hirer Mëttespaus zeréck an hunn e Feier am alen Tuerm entdeckt. Kuerz no zwou Auer scho waren d’Stater Pompjeeë mat hirem ganze Material op der Plaz, fir d’Feier ze läschen. Se ware sech schnell bewosst, datt den Tuerm an de Koup fale géif, an hunn hir Schläich schnellstméiglech aus der Ënneschtgaass a Richtung Kathedral verluecht, fir d’Feier vun där Säit aus ze bekämpfen an esou ze verhënneren, datt d’Feier op d’Haaptschëff vun der Kathedral an op d’Nationalbibliothéik géif iwwergräifen. Iwwer Funk gouf Ënnerstëtzung geruff a kuerz drop waren och d’Protection civile an déi fräiwëlleg Pompjeeën aus der Ëmgéigend op der Plaz.

Mëttlerweil koumen d’Flame schonn aus dem Gemaier vum Tuerm an d’Hëtzt huet d’Pompjeeën dru gehënnert, no genuch un d’Feier erunzekommen, fir et ënner Kontroll ze kréien. Duerch e Kuerzschluss ass d’Klackespill nach eng leschte Kéier ertéint, éier den Tuerm géint hallwer dräi zesummegefall ass. En Deel vum Gespär ass duerch den Daach vun der Kathedral an d’Mëttelschëff eragefall, aner Deeler sinn op den Daach vum Ausseministère gefall an et gouf gefaart, datt hei en zweet Feier kéint entstoen.