Special Olympics
„Let me win. But if I cannot win, let me be brave in the attempt.“ Dëst ass de Motto vun de Special Olympics, dat iwwersat sou vill heescht wéi: „Looss mech gewannen. Mee wann ech net gewanne kann, da looss mech et mat Courage probéieren.“ Dëse Saz steet fir d’Grondwäerter vun dëser Beweegung. Hei gëtt betount, datt et net nëmmen ëm d’Gewanne geet, mee virun allem ëm den Effort, de Courage an d’Motivatioun, säi Bescht ze ginn. Soumadder ass et d’Haaptzil vun de Special Olympics, Persoune mat kognitiven Aschränkungen, Down-Syndrom oder och Autismus d’Méiglechkeet ze ginn, hir Liblingssportaart ausüben ze kënnen. De Fokus läit also net nëmmen op der Kompetitioun, mee ass och op de Spaass an déi sozial Interaktioun ausgeriicht. Trotzdeem gëtt och d’Leeschtung respektéiert, andeems d’Athleeten no hiren Niveauen agedeelt ginn, fir fair Chancen ze garantéieren.
D’Federatioun bitt haut 14 Sportaarten un, dorënner z. B. Basketball, Vëlo, Fussball, Schwammen a Boccia. An dësen Disziplinne ginn och ëmmer nees national Turnéieren – och an Zesummenaarbecht mat de verschiddene Federatioune wéi der FLBB oder der FLF – organiséiert. Bei den Eventer, besonnesch am Basketball, kënnen och Leit ouni Handicap matmaachen, allerdéngs ouni dobäi eng dominant Roll anzehuelen. Mee d’Veranstaltunge ginn och wäit iwwer den nationale Kader eraus. Am Laf vun de Joren huet Lëtzebuerg schonn u ville groussen internationale Kompetitiounen deelgeholl, dorënner och e puermol un de Special Olympics World Games, déi all véier Joer am Summer a Wanter stattfannen.
Bei de leschte Summerspiller 2023 zu Berlin war Lëtzebuerg mat 42 Persounen um Start a konnt fënnef Gold-, fënnef Sëlwer- a siwe Bronzemedaile gewannen. Méi rezent waren d’Special Olympics World Winter Games zu Turin, wou Lëtzebuerg mat 11 Sportler an dräi Disziplinnen (Schifueren [Ski alpin], Laanglaf a Schnéischong-Goen) ugetrueden ass. Hei konnten d’Lëtzebuerger Sportler um Enn dräi Gold-, véier Sëlwer- an dräi Bronzemedaile mat heem huelen. Den Ierfgroussherzog Guillaume, deen zanter 2017 Parrain vun de Special Olympics Lëtzebuerg ass, huet d’Athleete souguer an Italien ënnerstëtzt.
Dës Eventer suergen och derfir, dësen Athleete méi Visibilitéit ze ginn. Dëst ass och fir de lëtzebuergeschen Nowuess wichteg, well et net ëmmer einfach ass, nei Membere fir d’Special Olympics ze gewannen. Dat ass och ee vun den Haaptziler fir d’Zukunft: méi Präsenz no baussen ze weisen. Eppes, wat och derbäi hëlleft, d’Special Olympics méi populär ze maachen, ass, wann d’Sportler, déi drun deelhuelen, wéinst hire Leeschtungen an de Medien erwäänt ginn. E gutt Beispill dofir ass d’Auszeechnung vum Liichtathleet Eike Schröder, dee bei der leschter „Awards Night“ vun der sportspress.lu mam „Prix Sport et Handicap“ ausgezeechent gouf. Elo hofft een an der Federatioun, datt nach weider Éierungen derbäikommen.
Paralympics
„Spirit in Motion“ ass de Motto vun de Paralympics. Dëse Sproch reflektéiert d’Determinatioun an d’Engagement vun den Athleeten a symboliséiert déi kontinuéierlech Entwécklung vun der paralympescher Beweegung. Zu Lëtzebuerg këmmert sech de Luxembourg Paralympic Committee (LPC) ëm de Behënnertesport. Dës Organisatioun ass zoustänneg fir d’Entwécklung vum Leeschtungs- a Breedesport fir Persoune mat kierperlechem Handicap.
Déi éischt Kéier, datt eng lëtzebuergesch Delegatioun un de Paralympesche Spiller deelgeholl huet, war 1976 zu Toronto. Déi erfollegräichst Kéier war awer 1984, wéi d’Lëtzebuerger Delegatioun mat den Exploite vum Henri Kaudé (eemol Gold an zweemol Sëlwer am Schwammen) an dem Mathias Bingen (Sëlwer am Speerwerfen) national fir Schlagzeile gesuergt hat. Déi lescht Paralympesch Summerspiller 2024 sinn deene meeschte Sportsfanatiker wuel nach a beschter Erënnerung. Zu Paräis huet de Para-Liichtathleet Tom Habscheid mat senger aussergewéinlecher Leeschtung eng Bronzemedail am Bommstousse gewonnen. Hie krut dës souguer vun der Groussherzogin Maria Teresa iwwerreecht a gouf als éischte Para-Sportler iwwerhaapt als Lëtzebuerger „Sportler vum Joer“ vun der sportspress.lu ausgezeechent. Dat war net nëmme fir Lëtzebuerg eng Première, mee souguer weltwäit. Nach ni konnt e Parasportler dësen Titel fir sech entscheeden. En immens emotionaalt Joer goung domadder fir den Tom Habscheid op en Enn. Dofir war et net verwonnerlech, datt den Athleet vum CA Diddeleng op sengem absolutten Héichpunkt seng Sportschong un den Nol gehaangen huet. Soumadder huet hien d’Relève un déi aner Para-Sportler wéi d’Katrin Kohl (Para-Liichtathleetik), de Steve Nothum (Para-Sportschéissen), de Joël Adams (Para-Vëlo) an de Joé Kurt (Para-Triathlon) weiderginn.
Wa mer awer méi konkreet op den LPC aginn, sou gesäit een, datt si eng ganz Rei vu Sportaarten ubidden, dorënner de Para-Radsport, d’Para-Liichtathleetik, de Para-Triathlon, d’Para-Sportschéissen, de Para-Dëschtennis an de Para-Judo. An dësem Kontext kann ee vläicht op déi verschidde Projete vum LPC agoen, z. B. op d’Konzept „JuDoYourBest“ am Para-Judo, dat an Zesummenaarbecht mat der FLAM speziell fir Persoune mat Seebehënnerung initéiert gouf. Aner Pläng sinn „I’mPOSSIBLE“, en internationalen edukative Programm vun der Agitos Foundation, deen d’Bewosstsinn a puncto paralympesch Beweegung fërdert, an dann nach „50 +1“, eng Initiativ, fir méi Persoune mat Behënnerung an de Sport ze integréieren an inklusiv Strukturen an de Veräiner opzebauen. All dës Kooperatiounen hunn d’Zil, d’Inklusioun am Sport ze stäerken. An dësem Gedanke vun der sozialer Aglidderung sinn d’„Luxrollers“ e Paradebeispill. Dës Rollstullbasketball-Ekipp gouf 1987 gegrënnt an trëtt scho säit e puer Joerzéngte géint aner Ekippen aus dem Ausland un. E gesonde Mix aus Kompetitiounen a Spaass gi bei hinne säit jeehier groussgeschriwwen.
Opgrond vun dëse ville positive Beispiller wëll den LPC änlech Initiative wéi „JuDoYourBest“ an anere Sportsdisziplinnen opbauen, fir d’Participatioun vu Persoune mat Behënnerung am Sport an Zukunft weider ze erhéijen. D’„Paralympic Days“, déi an deene leschte Joren hei zu Lëtzebuerg organiséiert goufen, sti sënnbildlech dofir, datt ëmmer nei Iddeeë konzipéiert ginn. Et kann een also gespaant sinn, wat den LPC sech an nächster Zäit nach alles afale léisst.
En Artikel vum Laurent Neiertz
