Op der Dier steet „Luxembourg House“ an a méi klenge roude Buschtawe „Concept Store“. Donieft, net ze iwwersinn, trount de rout-bloen X. Dobanne gesäit et e bësse wéi an enger Galerie aus: wäiss Maueren, Parquetsbuedem a vill Beliichtung vun uewen. Direkt an d’A spréngt eng grouss dräidimensional Konstruktioun vum X. Déi ass awer definitiv net deen eenzege Protagonist am Buttek. Hanne bei der Fënster steet eng Statu vum Reenert, avantgardistesch Péckvillercher bevëlkeren en Dësch an der Mëtt, e Roude Léiw aus Lubrix, enger lëtzebuergescher Legosvariant, huet sech op engem Regal breetgemaach an och soss sinn nach vill interessant Objeten ze entdecken. Kaffi, deen hei am Land geréischtert gëtt, Hunneg, Moschter, Wäin an Gin, déi zu Lëtzebuerg gemaach ginn, an zum Beispill och Kichelcher, déi scho mat der Etikett „Schéin Ouschteren“ de passenden Text fir déi nächst Feierdeeg hunn. Rezent ass d’Royal Collection derbäikomm, déi Artikele ronderëm de groussherzoglechen Haff ubitt.
D’Luxembourg House ass fir d’éischt 2016 opgaangen a schafft säit September 2023 ënnert engem kollaborative Konzept.
Déi fix Fraise ginn tëschent all de Partner, déi hir Produiten a Form vun engem Dépôt-vente ausstellen, verdeelt. Déi mëttlerweil 92 Partner definéiere selwer, wéi eng Artikelen se wëlle presentéieren, leeën de Präis fest a kréien 90 % vum Revenu.
Mee wat genee ass dann elo déi konkreet Iddi hannert dem Luxembourg House a wat huet de Buttek mat dem Erziele vu Geschichten an Nation-Branding ze dinn? D’Luxembourg House ass virun allem eng Plattform, op där lëtzebuergesch Betriber hir lokal, nohalteg a saisonal Produite kënne presentéieren. Et geet drëms, lëtzebuergesch Artikele visibel ze maachen an domadder och de Savoir-faire vum Land ze erhalen a weiderzeerzielen.
Lëtzebuerg soll unhand vun diverse Produiten an all senge Faarwen a Facettë virgestallt ginn. An hei kennt den Aspekt vum Geschichtenerzielen, dem sougenannte Storytelling, mat eran. D’Artikele sollen net nëmme verkaf ginn, mee och den Hiersteller soll portraitéiert an d’Produktiounsschrëtt sollen erkläert ginn. Besonnesch trëfft dat op d’LuXembourg Collection zou, déi et zënter 2019 gëtt. D’Produiten, déi zu dëser Kollektioun gehéieren, hunn eng zentral Representatiounsfunktioun; se ginn op offiziellen Eventer verdeelt a spille fir d’Ministèren an d’Ambassaden eng wichteg Roll.
All Artikel vun der LuXembourg Collection ass gekennzeechent mam Logo „LuXembourg – Let’s make it happen“. D’Initiativ, fir Lëtzebuerg am Ausland ze promouvéieren, gouf 2016 lancéiert. Fir dat Zil ze erreechen, ginn d’Valeuren an d’Gesiichter esouwéi de Savoir-faire vum Land an de Vierdergrond placéiert.
D’Luxembourg House ass eent vun den Haaptelementer an der Missioun vun der Promotion de l’image de marque – dat erkläert de groussen, rout-bloen X an der Mëtt vum Buttek. D’Lëtzebuerger Geschicht gëtt hei a Form vu manifesten Objeten op enkstem Raum erzielt. Zwou vun deene Geschichte gëllt et elo, exemplaresch ze presentéieren:
Wie virun Ouschteren nach no Kaddoe mat enger lieweger Geschicht sicht, deen huet am Luxembourg House eng interessant Auswiel.
En Artikel vum Heng Barone