Ham, Frittenan Zalot

Ham, Fritten
an Zalot

e Lëtzebuerger Klassiker modern interpretéiert

Zoutaten fir 3 bis 4 Leit

[membership level="2,3,4" show_noaccess="true"]

Fir d‘Mousse

100 g gekachten Ham
10 g Philadelphia
10 cl Ram
½ Zéif Knuewelek

Fir d‘Fritten

100 g Vitelotte- oder Trüffel- Gromperen (mof)
100 g Bintje-Gromperen (wäiss)
100 g séiss Gromperen (orange)
Frittefett (oder besser: blanc de bœuf)

Fir d‘Zalot

1 Bott Brunnenkresse
1 Pak Rucola
1 Pak Shiso
1 Pak Ierbesesprossen
10 ml Balsamicoesseg
100 ml Olivenueleg
Salz a Peffer

Fir d‘Hamchipsen

100 g réi Ham an Tranchen (net ze fetteg)

Preparatioun

Déi gekachten Ham a kléng Stecker schneiden. De Philadelphia an d‘Ram vermëschen. Déi kléng Stecker Ham zesumme mat der Philadelphia-Mëschung an d‘Kichemaschinn maachen a mat Knuewelek, Salz a Peffer wierzen. An der Kichemaschinn verklengeren bis eng homogen Mass entsteet. Schmaachen, wann néideg nach eng Kéier nowierzen an an de Frigo stellen.

Zwou Tranchë réi Ham tëschent zwee Stécker Kichepabeier leeën an an der Mikrowell ongeféier 1 Minutt laang bei 650 bis 1000 Watt ophëtzen. Kontrolléieren op d‘Tranchen och gutt knuspereg sinn.

Déi dräi Zorte Grompere schielen, a Fritteform schneiden an dann am Frittendëppe knuspereg frittéieren.

Tipp vu Kichechef

D‘Fritte gi besser, wann se am blanc de bœuf frittéiert ginn! Op engem Kichepabeier ofdrëpse loossen a salzen.

Déi verschidden Zalote wäschen a mat Salz a Peffer wierzen. E puer Drëpse Balsamicoesseg, an den Olivenueleg drop verdeelen. Alles matenaner vermëschen.

Gudden Appetit!