© Gwendolynn Bertemes
Et ass e memorabele Moment. De Guy Bertemes an ech stinn zu Lëlz an der Géigend vum Restaurant Chiche! Um Séi bei engem Gelänner a kucken op de Stauséi erof. D’Sonn dréckt nawell gutt, de Schweess steet eis alle béid op der Stier. Bestëmmt géifen dem Guy Bertemes seng Ae fonkelen, wa se net hanner deem däischtere Sonnebrëll verstoppt wären. Hien huet mir grad erzielt, wat fir e wonnerbaart Gefill et ass, mueres an de Stauséi ze sprangen an do ze schwammen, wann de Fréijoersreen duuss op d’Waasser plätschert. D’Keelt vum Waasser mécht ee richteg wakereg, de Kapp gëtt ëmmer méi roueg an et kéint ee bal mengen, d’Plätschere vun de kale Waasserdrëpse géif de Rhythmus vun de Schwammbeweegunge begleeden. Wat e Genoss!
De Guy Bertemes erënnert sech nach un en anert, ganz spezifescht Naturerliefnis, dat hien hei um Stau hat. Hien ass um Séi ukomm a wollt an d’Waasser sprangen, mee den Niwwel war esou déck, dass et knapps méiglech war, e puer Meter wäit ze gesinn. Bal wär hien erëm heemgefuer, well esou eng schlecht Siicht net ongeféierlech ass – mee d’Loscht, an d’Waasser ze goen, huet awer gewonnen. Wärend dem Schwammen huet déi gro Mauer aus Niwwel sech op eemol opgeléist an d’Sonnestralen hunn hire Wee bei de Schwëmmer fonnt. Ech lauschteren no a stelle mir eng hell Luucht vir, déi een um Enn vun engem däischteren Tunnel erwaart – déi muss engem dann nach méi hell a schéi virkommen. Ech kréien Héngerhaut; esou lues kann ech dem Guy Bertemes seng Passioun fir d’Schwammen an der fräier Natur novollzéien, esou en Erliefnis huet een net am Baseng.
„Et gëtt eng Anekdot vu mengem Papp. Hien huet gären erzielt, wéi e mech als wierklech klenge Bouf spontan an d’Waasser geheit huet. D’Leit ronderëm ware skandaliséiert, mee d’Kand ass einfach geschwommen“, schmunzelt de Guy Bertemes. Déi Erzielung ass en onmëssverständlechen Indiz fir seng Waasser-Affinitéit, an awer huet säi Wee um Land ugefaangen. No der Arméi hat hie verschidde Méiglechkeeten, fir eng berufflech Karriär anzeschloen. Fir de Guy Bertemes war et direkt kloer, dass hien net géif bei d’Police goen oder Bréifdréier ginn, mee als Ënneroffizéier am Prisong zu Schraasseg ufänken (mëttlerweil schwätzt ee vun agent pénitentiaire). „Et huet mech einfach interesséiert. Et ass ofwiesslungsräich an et gëtt een erausgefuerdert. Du bass zwar ëmmer an denge Maueren, wat och scho speziell ass, mee et ass awer ëmmer eppes aneschters.“
Zënter 1998 schafft de Guy Bertemes zu Schraasseg, dat sinn elo 27 Joer. An där Zäit huet hie vill verschidden Aarbechtsberäicher innerhalb vum Prisong kenne geléiert. Dass d’Poste gewiesselt ginn, ass Usus, a jonke Joren ëfters wéi spéider. Aktuell ass hie wärend sechs Méint um Inspektiounsbüro. Hei ginn z. B. Krankmeldunge geréiert, d’Beamte ginn op déi verschidde Posten opgedeelt a virun allem mussen och ëmmer erëm Léisunge fir divers Probleemer fonnt ginn, déi an esou engem Aarbechtsmilieu gäre spontan optauchen. Den Extreemschwëmmer stellt fest: „Als jonke Mann hunn ech de sougenannte Büro ugeruff, wann ech net méi wosst, wat maachen, elo sinn ech selwer ee vum Büro.“
Dem Guy Bertemes säin Aarbechtsfokus läit allerdéngs net am administrative Beräich, mee de Gros vun der Zäit huet hien am Kontakt mat de Gefaangene verbruecht. Op meng Fro, wéi säin Aarbechtsalldag mat de Leit am Prisong dann ausgesäit, äntwert hie prompt: „Et muss ee kënne séier switchen. Stellt Iech eng Abteilung mat dräi Stäck vir. Um drëtte Stack gëtt een nawell hefteg beleidegt, da muss de kënne professionell bleiwen, mee du bass gereizt, genervt. Um zweete Stack kënnt e Gefaangene souzesoe bei dech kräischen, well seng Frëndin e verlooss huet, da muss de dorobber richteg reagéieren. An um éischte Stack stellt een dir eng ganz seriö Fro: ‚Chef, ech well den Artikel honnert ufroen, libération conditionnelle, wat sinn do déi genee Schrëtt?‘ Dat sinn dräi komplett verschidde Situatiounen, an du muss ëmmer eng passend a professionell Reaktioun parat hunn.“
Sport ass fir de Guy Bertemes en optimalen Ausgläich zum Schaffen an erweist sech ëmmer erëm als wichtegen Deel vu sengem Liewen. De Wee an d’Waasser féiert hien och hei als éischt iwwer d’Land. Mat 18 Joer, also 1990, huet hien d’Lafe fir sech entdeckt. Hien ass Marathone gelaf a war richteg gutt doran. No der Arméi huet de Guy Bertemes eng Zäitche guer kee Sport gemaach, bis hien dann op de Vëlo geklommen a ronderëm ganz Lëtzebuerg gefuer ass – dësen Tour ëmfaasst 365 Kilometer an et sinn och eng 4.000 bis 5.000 Héichtemeter ze maachen. 2017 koum et dunn zum Changement: De passionéierte Cyclist huet en neien Challenge gesicht an an enger Triathlon-Zeitung iwwer dat sougenannten 100×100-Meter-Schwamme gelies.
„D’100×100-Meter-Schwammen ass Kult. E gudde Schwëmmer huet dat gemaach. Et ass e bëssen de Marathon fir d’Schwëmmer“, erkläert de Guy Bertemes, deen nach 2017 un esou engem Event zu Hamburg deelgeholl an déi Excursioun mat enger klenger Familljevakanz kombinéiert huet. Hien huet déi 10.000 Meter gutt gepackt an dat Joer drop bei sengem éischte 24-Stonne-Schwammen zu Ooche matgemaach (bei dësen Eventer geet et dorëm, esou vill wéi méiglech Kilometeren an der Zäitspann, déi virgesinn ass, ze schwammen). D’Form huet no uewe gewisen; de Guy Bertemes huet et geschafft, véierandrësseg Kilometer ze schwammen, a mat där Distanz ass em eng zéngte Plaz gelongen. Eemol dobäi, da leeft et richteg: Dat selwecht Joer ass hie seng éischt Bodenseequerung ugaang; dat sinn zwielef Kilometer a geschwomme gëtt vu Friedrichshafen an Däitschland op Romanshorn an der Schwäiz. „Ech sinn deen éischte Lëtzebuerger, deen dat gemaacht huet“, seet de Guy Bertemes houfreg. Säi bis elo gréisste Coup huet hien awer 2019 zu Meiningen bei engem 24-Stonne-Schwamme gelant. Hei ass hie ronn 50 Kilometer geschwommen, wat fir déi zweet Plaz duergaangen ass.
Wéi esou e Schwamm-Event, dat sech iwwer e ganzen Dag zitt, ausgeet, kann een an der Reegel net konkreet viraussoen. „Meeschtens – an dat ass e bësse witzeg –, hëlt ee sech eppes vir, mee et kann een et seelen anhalen. Et kennt een zwar säi Kierper, mee et ass awer ëmmer aneschters.“ Natierlech spillt net nëmmen de Kierper eng wichteg Roll bei esou enger extreemer sportlecher Leeschtung, mee och de Kapp muss an enger gudder bis optimaler mentaler Verfassung sinn, fir dat viséiert Zil ze erreechen. „Mäi Kierper ass gutt trainéiert. Meng mental Stäerkt ass och gutt, mee se kéint awer nach besser sinn. Fir déi Projeten, déi ech nach virhunn, déi méi grouss sinn, muss se nach besser ginn“, reflektéiert de Guy Bertemes. Hie schafft dofir mat Autosuggestioun, dat heescht, soubal hie mierkt, dass en ufänkt mat zweiwelen, setzt en deenen negative Gedanken offensiv positiv Selbstgespréicher entgéint.
Doniewent probéiert de Guy Bertemes och, reegelméisseg ze meditéieren, wat him zäitlech awer net ëmmer geléngt. Am beschte Fall gëtt d’Schwamme selwer zur Meditatioun – dat virun allem dobaussen an der Natur, wou den Extreemsportler am léifste schwëmmt. Dee meditativen Zoustand ass wéi e Flow, bei deem de Mënsch eng ganz spezifesch Verbindung mat senger Ëmgéigend ageet: „Et ass schwéier ze beschreiwen, mee ech spieren d’Natur dann op eng aner Aart a Weis, virun allem, wann et e bësse méi kill ass. Ech spiere mech gebuergen a verbonne mat der Natur. Wann ech am Bodensee sinn an ech hu sechs Kilometer viru mer a sechs Kilometer hanner mer an dobäi och nach d’Bierger viru mer, dann ass dat genial schéin an einfach impressionant. An engems kritt ee mat, wéi kleng ee wierklech ass. Ech sinn dann net géint d’Natur, well ech hunn absolut keng Chance, mee ech sinn en Deel vun der Natur, mat der Natur, ech genéissen dat absolut. An esou Momenter sinn ech wierklech ganz dankbar.“
Déi Freed, déi de Guy Bertemes an esou Momenter spiert, wëll hie gäre weiderginn. Déi Iddi huet sech am Joer 2023 wärend engem 24-Stonne-Schwammen zu Saarlouis konkretiséiert. Hei huet den Extreemsportler gesinn, wéi Leit mat enger kierperlecher Aschränkung – dorënner och Kanner mat schwéieren (Muskel-)Krankheeten – um Schwammen deelgeholl hunn, z. B. eng Längt geschwomme sinn an dobäi eng riseg Freed haten. De Guy Bertemes war gläichzäiteg faszinéiert an touchéiert an huet sech gefrot, ob een eppes Änleches zu Lëtzebuerg kéint organiséieren. D’Resultat war d’Grënnung vun der ASBL Team BOW24. BOW steet dobäi esouwuel fir „Bodensee Open Water“ ewéi och fir „Bertemes Open Water“ (ëmmerhin ass den Extreemschwëmmer de President vun der ASBL) an d’Zuel 24 fir d’Grënnungsjoer an och fir d’Affinitéit fir d’24-Stonne-Schwammen. „De Comité ass bewosst kleng gehalen, mee de Staff hannendrun, op dee mir kënnen zeréckgräifen, ass relativ grouss“, erkläert de Guy Bertemes. Eng gutt Zesummenaarbecht besteet beispillsweis mat deem däitschen Team Warmduscher an och mat der Pro-Inklusionsschaukel vu Saarlouis.
D’Team BOW24 huet an éischter Linn zwou Missiounen: D’Organisatioun vun Inklusiounseventer ronderëm d’Schwammen an d’Installatioun vun engem bessere Waasseraccès fir Persoune mat enger kierperlecher Beanträchtegung. Den 8. Juni dëst Joer ass fir d’zweete Kéier e 6-Stonne-Schwammen zu Lëlz um Stauséi organiséiert ginn; dësen Event soll vun elo un eemol am Joer stattfannen an zur Traditioun avancéieren – fir d’nächst Joer ass den 31. Mee ugepeilt. Et ass e sportlecht Event mat engem Klassement, ma de Fokus läit awer op der Inklusioun. Kierperlech beanträchtegt Leit sinn net nëmme wëllkomm, mee et geet och explizitt dorëm, mat hinnen zesummen ze schwammen.
„Mir wëlle gären inklusiv sinn“, kommentéiert de Guy Bertemes a seet direkt weider: „A mir wëlle gären dorop opmierksam maachen, dass op verschiddene Plazen den Accès an d’Waasser hei zu Lëtzebuerg nach ëmmer net ginn ass.“ Dat grousst Zil ass et, zesumme mat der Gemeng Esch-Sauer eng Infrastruktur – eng Ramp oder eppes Änleches – zu Lëlz ze installéieren, fir den Zougang zum Stauséi kënne barriärefräi ze maachen. Esou eng Konstruktioun, wéi ee se um Bodensee méi dacks géing gesinn, soll vun der ASBL matfinanzéiert ginn.
De Guy Bertemes huet sech den Numm „Luxaquaman“ ginn – domat dréckt hien de Bezuch zu sengem Hierkonftsland a seng Affinitéit fir d’Waasser aus. Natierlech ass deen Numm och eng Uspillung op den amerikanesche Superheld aus dem DC-Universum, deen ënner Waasser kann ootmen an de Kinnek vun Atlantis ass. Den Extreemschwëmmer géing dat ni selwer vu sech behaapten, mee eigentlech ass och hien en Held, deen am Alldag fir d’Inklusioun kämpft. De Feind ass séier detektéiert: „D’Leit gi méi rücksichtslos, dat mierkt een am Alldag. Méi Egoismus ass ze gesinn. Dat fannen ech net gutt. D’Leit si sech net bewosst, dass et e Geschenk ass, e gesonde Kierper ze hunn an ouni Hindernisser am Stau kënnen ze schwammen. Alles ka sech séier änneren: en Accident, eng Krankheet – et kann all Moment jiddereen treffen!“
Mol net eng Woch no eisem Gespréich um Stau trëfft et de Guy Bertemes selwer. An enger Sproochnoriicht vum Bodensee erzielt hien, dass en e Leeschtebroch huet a muss operéiert ginn. Seng nächst dräi Schwammziler falen also an d’Waasser. D’Angscht ass do, d’Zweiwele sinn do: Mécht et iwwerhaapt nach Sënn weiderzemaachen? Ass d’Motivatioun nach grouss genuch no enger forcéierter Paus vun ongeféier dräi Méint (et ass deen zweete Broch innerhalb vun dräi Joer)? Ech wënschen dem Luxaquaman alles Guddes fir seng Operatioun an hoffen, dass hie wéi all d’Helden nach méi staark zeréckkënnt.
En Artikel vum Heng Barone
