„Et ass alles vill méi familiär a mir hëllefen och gäre bei Eventer oder an der Buvette. Do, wou Nout um Mann ass, si mir als Fans do.“ E puer mol am Joer géif e Partybus organiséiert ginn, fir e Match erop an de Norden ze fueren a genee wéi bei den M-Block Fanatics wier een och hei bei all Auswäertsmatch dobäi. Uerdentlech vollgepaakt mat Fussball sinn och dem Chris Baltes seng Deeg. Vu Klengem u war den Escher an der Jeunesse aktiv, fir d’éischt a sämtleche Jugendekippen, dunn an der zweeter an drëtter Ekipp a mëttlerweil als Comitésmember a fixe Supporter. „Fir mech ass et ni en anere Veräi ginn“, esou de Chris. Ma dëst stëmmt net esou ganz, well wann een iwwer d’Lëtzebuerger Landesgrenz erausgeet, da steet fir hie Borussia Mönchengladbach op der Nummer Eent.

„Mäi Monni a mäi Bop waren ëmmer grouss Bayern-Fans an ech sinn och alt e Match mat kucke gaangen, mee dat war net esou dat. Wéi ech meng Fra du kenne geléiert hunn, sinn ech op Gladbach gestouss, well d’ganz Famill si fanatesch Fans vum Veräin.“ Zënter 2009 geet de Chris all eenzele Match vum däitsche Fussballclub kucken – wann en emol ee Spill verpasst, ass dëst wierklech aussergewéinlech. „Als Beispill: E Sonnde war ech op Berlin Gladbach géint Union Berlin an der Bundesliga kucken, en Dënschden dunn als Tourist den FC Bayern München géint Inter Mailand, e Mëttwoch AC Mailand géint den FC Salzburg an e Freiden ass nees de Flichttermin Gladbach géint de VfB Stuttgart“, esou de Chris.

Mat engem Grupp Kolleegen huet hien e klenge Fanclub gegrënnt, deen zwar hei net als offiziell ASBL registréiert ass, zu Gladbach selwer awer eng Dauerkaart besëtzt. „Mäi Schwéierpapp an ech hunn néng Dauerplazen zu Gladbach. Heiansdo gi mir zwar just zu fënnef dorop, well net jiddereen esou geckeg ass wéi mir a sech allkéiers Congé hëlt, ma d’Ambiance bei eis ass awer ëmmer gutt!“ Mol géif ee sech mat de Fans vun dohanne virum Match am Biergarten treffen, mol misst seng Fra als Supporter duerhalen an en „Tëschestopp“ am Stadion aleeën: „Et ass scho mol virkomm, dass mir aus der Vakanz aus den USA zu Frankfurt gelant sinn, schnell eng kleng Wallis ëmgepaakt hunn an op Berlin weider gereest sinn, well Gladbach do gespillt huet.“

Mat all de Reeskäschten, déi duerch säi Fan-Sinn zustan kommen, kéint de Chris sech all Joers e klengen Auto leeschten, well egal op Zypern, Manchester, d’Ukrain oder d’Tierkei – dem Supporter ass quasi kee Wee ze wäit. Just d’WM am Katar wäert de Fussball-Fanatiker sech net ukucken, well hei hält fir hien – esou wéi fir d’Membere vum Nationalekipp-Supporterclub och – all Léift fir de Sport op: „Fir d’Finall vun der Weltmeeschterschaft wäerte mir ënner Kolleegen op Hamburg op de Chrëschtmaart goen, well dat Ganzt kënnt fir eis net an d’Tut a gëtt boykottéiert. Ech gi ganz vill d’Lëtzebuerger d’Nationalekipp kucken an och déi däitsch, mee Russland oder Katar gi fir mech guer net.“ Et kéint net sinn, dass een hei misst Energie spueren, wärend an enger Wüüst fir eng Wanter-WM géif e Stadion gebaut ginn, dofir wier d’Net-Organiséiere vu Public Viewingen oder aneren Eventer an dësem Kontext nëmme richteg.