Ewéi d’Spréchwuert seet: E Fësch schwëmmt a sengem Liewe just 3 Mol. Am Waasser, am Schmalz an am Wäin!

Vun där Iddi inspiréiert, entsteet eng lackeleg Kombinatioun vu Rieslingszooss a 4 frëschgefëschte Reebou-Frellen aus eisem klenge Ländchen.

Dir braucht (fir 4 Persounen):

• 4 Reebou-Frellen
• 280 Milliliter Riesling (Réislek)
• 300 Milliliter Sauerram
• 1 Tellerche Miel
• 60 Gramm kale Botter
• 1/2 Bott Péiterséileg
• 4 Schallotten
• 1 Zoppeläffel Kierwel
• 1 Zoppeläffel Estragon
• 4 Staange Bratzelen
• 1 Läffelche Paprika
• Salz
• Peffer

1. Déi 4 Frelle botzen a mat frëschem Waasser ausschwenken. Mat engem Duch ofdréchnen. D’Frellen am Bauch gutt salzen a pefferen an 1 Mol am Miel dréien.
2. De Botter an enger grousser Pan schmëlze loossen an d’Frellen 2 bis 3 Minutten ubake loossen.
3. Eng feierfest Schossel mat Botter aschmieren an déi gëlle-brong ugebake Frelle virsiichteg draleeën.
4. Déi grouss Pan weiderbenotze fir d’Schalotten (dënn Scheiwen) 2 bis 3 Minutten ze broden. Dann de Riesling bäiginn, Kierwel, Estragon, Bratzelen (kleng geschnëppelt) an de Paprika bis un d’Kache bréngen.
5. Op méi klenger Flam d’Sauerram bäiginn an 2 bis 3 Minutte mat engem hëlzene Läffel réieren.
6. Déi fäerdeg Zooss an d’feierfest Schossel iwwert d’Frelle schëdden. Dat Ganzt an engem virgehëtzte Schäffche bei 180 Grad fir graff 20 Minutte baken.