Eng nach méi nei Alternativ ass „AirBnB“. D’Online-Plattform aus Kalifornien huet an de leschte Joren och hire Wee op Lëtzebuerg fonnt an ëmmer méi Privatpersoune verlounen en Zëmmer, eng Wunneng oder e ganzt Haus iwwer dëse Site. Och d’Lisa Castagna a seng Famill si säit ronn aacht Joer „Hosts“ bei AirBnB. „D’Haus wat mir verlounen, gehéiert mengen Elteren. Fréier si mir ëmmer selwer dohin an d’Vakanz gefuer, mee d’Joer iwwer stoung et vill eidel“, erkläert d’Lisa. Den ale Bauerenhaff läit am Duerf Harel, net wäit ewech vum Stauséi Uewersauer a bitt Schlofméiglechkeete fir bis zu zéng Persounen. „Déi meescht vun eise Gäscht kommen aus Holland oder der Belsch. Mir hu vill Famille mat Kanner awer och Mountainbiker a Leit mat Hënn“, sou d’Lisa. De Minimumopenthalt läit bei dräi Nuechten, fir zwou Persoune kascht eng Nuecht 70 Euro ouni Taxen. Dat rustikaalt Bauerenhaus kënnt gutt u bei de Leit. „Et hu schonn e puer Gäscht eis gefrot, ob mir d’Haus net verkafe wëllen an et gouf och schonn e Kuerzfilm hei gedréint“, verréit eis d’Lisa.

Aussergewéinlech an dowéinst an aller Mënner sinn d’Bamhaiser vum Escher Déierepark. Hei kréie virun allem Famille mat Kanner eng eenzegaarteg Iwwernuechtungsméiglechkeet gebuede, déi et esou am Land soss net gëtt. „All Haus huet en Thema an e Personnage, deen dra wunnt. Wann dësen an der Vakanz ass, da kënnen Touristen dra schlofen“, verréit d’Anne Meyers, Verantwortlech vum Park. Zwee Haiser fir allkéiers sechs Persounen an ee weidert fir véier Gäscht stinn uewen um Gaalgebierg. D’Iddi vun de Bamhaiser ass awer net, Leit iwwer e längeren Zäitraum ze beherbergen, ma éischter un eng zwou Nuechten hat ee bei der Entwécklung vum Projet geduecht. „De Charme dovun ass jo dat Entdeckerescht, dass alles enk ass, an d’Iwwerraschung, wann een erakënnt. Dat geet verluer wann een eng ganz Woch bleift“, esou déi Responsabel. De Mindestpräis vun engem Haische läit bei 120 Euro fir zwou Persounen – e berechtegte Präis seet d’Anne Meyers, wann een d’Eenzegaartegkeet an d’Lag vun de Bamhaiser bedenkt: „Et huet een den direkte Kontakt mat den Déieren an et ass matzen am Bësch, ma trotzdem ass een no bei der Stad Esch.“

E Krack méi bëlleg ass den Hotel Vieux Moulin zu Aasselbuer. Mat senger Annex Auberge du Relais postal ass dësen Hotel en echten Higucker, well déi zwee Gebaier sinn Undenken u fréier Zäiten. „Dat eent ass eng Mille vun iwwer dausend Joer mat 15 Zëmmer am Stil Chalet suisse, de Relais postal huet néng Zëmmer an ass e bësse méi chic“, erkläert d’Sekretärin vun der Famill Nilles, déi den Hotel bedreift. Niewent flotte Wanderungen duerch d’Lëtzebuerger Ardenne kënnen d’Gäscht vum Etablissement e Bléck an déi zwee Muséeën oder den nogebaute Klassesall un 1900 woen a sech vun alen Objete verzaubere loossen. Virun allem eeler Leit oder Gruppen zitt et op Aasselbuer, ma och Kanner an Hënn sinn hei gär gesinn. „Mir hunn eng Baach hei mat klenge Fësch, do spillen déi Kleng ëmmer immens gär dran“, verréit d’Bedreiwerin. Eng Nuecht am familiäre Betrib kascht fir zwou Persounen ab 50 Euro, jee nodeem fir wéi een Ënnerdaach een sech entscheet.

De Schluss vun der Lëscht mécht dann den Hotel Le Royal an der Stad. Säit 1984 gehéiert de Fënnef-Stären-Hotel zu deene prestigiéisten hei am Land an och weltwäit zielt de Royal zu den Top of the Tops. D’Elsie Danjou ass Directrice vum Marketing a verréit d’Geheimrezept vum Etablissement : „Mir leien am Häerz vun der Stad an hunn eng immens Qualitéitsgarantie mat ville Servicer.“ Zu der Haaptclientèle ziele Businessleit aus dem Ausland, déi fir eng oder zwou Nuechte geschäftlech op Lëtzebuerg reese mussen – oder däerfen. Viru knapp aacht Joer krut de Royal eng komplett Revisioun an huet domat och u Modernitéit dozou gewonnen. „Mir waren deemools laang bal komplett zou an hunn och vereenzelt Clientë verluer. Trotzdem hu mir eng grouss Zuel un treie Gäscht a virun allem ausserhalb vun de Schoulvakanzen ass den Hotel zu engem Groussdeel gebucht“, sou d’Elsie Danjou. E Minimum vun 270 Euro pro Nuecht bezilt ee fir eent vun den 210 Zëmmer a Suitten, ma dofir befënnt een sech awer och quasi matzen am Lëtzebuerger Bankendistrikt an direkt niewent all den touristeschen Highlights an der Stad.