Et ass also wichteg, datt mir och selwer, als Betrib, Aarbechts­plaze schafen. Eng Persoun mat Autismus an enger zousätzlecher, déifgräifender intellektueller Beanträchtegung huet selbstverständlech och um Niveau vun der Aarbecht ganz aner Besoinen ewéi eng Persoun mat Autismus, déi de Premièresexamen ofgeschloss huet. D’Erausfuerderung fir eis ass et also och, a ganz ënnerschiddlechen ekonomesche Beräicher aktiv ze sinn, esou datt mir fir méiglechst vill Leit eng Aarbecht kënnen ubidden, déi hire Kompetenzen a Preferenze gerecht gëtt. De Kandidat ka bei eis eng Aarbechts­plaz an der Kichen, der Konfiserie, dem Keramikatelier, der Wäscherei, der Bitzerei, der Gäertnerei, dem Pabeieratelier, der digitaler Dréckerei, dem Laser-Tec, dem Info-Media oder dem Back-Office fannen. Et wär fir eis mat Sécherheet méi einfach an ekonomesch sënnvoll, just an engem oder zwee Wirtschaftsberäicher aktiv ze sinn, mee domat kéinte mir nëmme wéinege Leit mat Autismus eng adaptéiert Aarbechts­plaz ubidden. Zu eise Mataarbechter mat enger Behënnerung hu mir dann och ëmmer eng duebel Bezéiung. Och wann d’Aarbechts­relatioun mat engem Aarbechts­vertrag an enger regulärer Pai am Vierdergrond steet, esou gëtt hanner dem Salarié de Mënsch, dee speziell Bedürfnisser huet, op kee Fall vergiess.

D’Servicer an d’Produiten, déi an de verschiddenen Atelieren ugebuede ginn, si vun héijer Qualitéit. Och wa muench kommerzielle Client vläicht déi éischte Kéier aus sozialen Iwwerleeungen op Produiten oder Déngschtleeschtunge vun der Vereenegung zeréckgräift, esou ass et dach d’Ambitioun vun de Responsabele vun den Atelieren, datt och dëse Client hinnen duerch d’Qualitéit vum Produit oder der Déngscht­leeschtung erhale bleift.