Här Ianni, wéi sidd Dir eigentlech op déi Iddi komm, 12 europäesch Kulturhaaptstied mat 12 musikalesche Kompositiounen ze verbannen?

Wärend der Aktioun My Urban Piano am leschte Joer hat ech menger Mamm fir Mammendag d’Stéck Mama gewidmet an hunn et op de Pianoen an der Stad Lëtzebuerg gespillt. E Kolleeg huet mech dobäi gefilmt. De Video hunn ech duerno op Facebook gesat. E gouf un engem eenzege Weekend ronn 25.000 Mol gekuckt. Dësen Erfolleg huet mech ugedriwwen, e méi grousse Projet an Ugrëff ze huelen.

An esou sidd Dir an en Zuch geklommen …

… fir mir do selwer ze begéinen. Fir den Dréi vum éischte Video huet eis d’CFL net nëmmen en Zuch zur Verfügung gestallt, mee esouguer d’Gleis 1 fräigehalen, an zwar e puer Stonne laang. Train of Dreams, dat ech fir d’Stad Lëtzebuerg geschriwwen hunn, ass e wierklech rasant Stéck a wie genee lauschtert, wäert d’Melodie vun der Lëtzebuerger Nationalhymn eraushéieren. Wat awer net heescht, datt ech op iergendeng Manéier politesch engagéiert sinn, esou houfereg ech och sinn, d’Land Lëtzebuerg am Ausland representéieren ze däerfen.

Déi zweet Statioun vun Ärem Projet huet Iech op Esch-Uelzecht gefouert, wou Dir d’Julie Schroell als Regisseurin an d’Brigitte Urhausen als Schauspillerin verflicht hutt. Wéi erkläert sech den Titel Heartland fir déi Stad, déi 2022 den Titel Europäesch Kulturhaaptstad droe wäert?

Ech sinn am Süden opgewuess. Ech hunn dës Regioun gär. D’Brigitte Urhausen kennen ech zanter menger Schoulzäit am Jongelycée. Et verbënnt mech immens vill mat Esch-Uelzecht, der eenzeger vun den 12 ausgesichten europäesche Stied, déi nach ni Kulturhaaptstad war. An dofir wollt ech onbedéngt do e Video dréien. Als eng Zort Ënnerstëtzung fir d’Kandidatur (zum Zäitpunkt vun den Dréiaarbechte war d’Entscheedung nach net gefall), awer och als Hommage.

Ass d’Ballad Heartland wéinst dëser Verbonnenheet méi roueg a méi gefillvoll ausgefall ewéi déi éischt Kompositioun, déi vun enger gewëssener Opbrochstëmmung gepräägt ass?

Genee. D’Stéck verzielt vu mengen Erënnerungen u meng Kandheet a Jugend. An natierlech vu mengen Ufäng als Museker. Ech hu mat néng Joer ugefaang, Piano ze spillen. Eng kuerz Zäit méi spéit hunn ech éischt Stécker komponéiert. Am Stéck Heartland bréngen ech meng Dankbarkeet iwwer dës Joren am Minett musikalesch zum Ausdrock. Déi Kompositioun bedeit mir ganz vill.

„Ech wëll mat menger Musek positiv Emotioune vermëttelen. De Mënsche Mutt an Hoffnung ginn.“

Wéi geet et elo weider?

Den drëtte Video an der aktueller dänescher Kulturhaaptstad Aarhus mam Titel Joy ass ofgedréit a gouf am September publizéiert. Ufank November ware mir zu Prag, wou mir op engem Boot mat Piano op der Moldau gefilmt hunn. Uschléissend gouf River of Love mam City of Prague Philharmonic Orchestra am Studio opgeholl. De Video wäert ech deemnächst an der tschechescher Haaptstad an den 3. Dezember zu Jonglënster virstellen. Wann de Projet ofgeschloss ass, ginn déi 12 Museksstécker op enger CD publizéiert. Geplangt ass och en Open-Air-Concert zu Lëtzebuerg. Awer nach ass et net esou wäit. Op menger Homepage, déi stänneg aktualiséiert gëtt, kann ee sämtlech Clippe mat alle méiglechen Infoen esouwéi Bonusmaterial ofruffen.

Dir sidd e grousse Fan vun de soziale Medien, gell?

Firwat net? Fir musikalesch Museksstécker visuell ze weisen, si Blogs, Facebook an Instagram ideal Medien. Ech sinn ausserdeem der Meenung, datt een de Mënschen den Zougang zur Musek esou liicht ewéi méiglech maache sollt.

Sidd Dir dofir mat Ären Eege­kompositiounen, déi éischter zum Beräich vum Mainstream gehéieren, aus der Klassik ausgebrach?

Ech hu mäin halleft Liewe laang Beethoven, Rachmaninoy a Chopin – fir nëmmen déi bekanntste Komponisten ze nennen – gespillt. Awer méi a méi hat ech de Besoin, mat menger Musek e méi breede Publikum unzeschwätzen. Doriwwer eraus hat ech ëmmer schonn en oppent Häerz fir den Jazzpiano vun engem Keith Jarrett a ka mech fir d’Soundtracks vu Filmkomponiste geneesou begeeschteren ewéi fir populär Songs vu Queen oder Coldplay. Wat mir als Komponist am wichtegsten ass: Ech wëll positiv Emotioune vermëttelen. Meng Musek soll de Mënsche Mutt an Hoffnung ginn.

Mat My Urban Piano wëllt Dir esouguer op gesellschaftspoliteschem Niveau eppes beweegen …

D’Abanne vun e puer europäesche Kulturstied soll d’Iddi vun enger gemeinsamer Kultur an Identitéit stäerken. Doduerch, datt e Kënschtler aus der jeeweileger Kulturhaaptstad den Optrag kritt, e Piano ze gestalten, gëtt de Projet ausserdeem zum Vehikel vun der bildender Konscht. An no all Aktioun gëtt de Piano un eng kulturell oder sozial Ariichtung verschenkt. Dofir déi gesellschaftspolitesch Nout.

A wou steet de Piano, deen de Raphael Gindt fir Heartland gestalt huet?

Am Ratelach an der Escher Kulturfabrik. Do kann e fir Concerten oder vu Geleeënheetspianospiller benotzt ginn, well, obwuel en als raschtege Piano gestalt gouf, ass et en excellent Instrument.

Iwwer den David Ianni:

Joergang 1979, huet zu Lëtzebuerg, an England an an Holland studéiert. Hat als 16-Järege mam 2. Pianoconcert vun Franz Liszt säin Debut. Am Joer 2005, ewéi hie fir e puer Méint am Stift Heiligenkreuz am Wienerwald gelieft huet, ass seng Léift zum gregorianesche Gesang, dee vun do un zu engem feste Bestanddeel vu senger Musek gouf, gewuess. Fir zwou CD-Aspillunge mat de Mënche vum Stift huet hien d’Pianosbegleedung komponéiert a gespillt – a krut fir dës Zesummenaarbecht d’Platin-auszeechnung an Éisträich. Déi béid Soloalbe mat Eegekompositiounen Night Prayers a Prayers of Silence sinn och vu geeschtlecher Musek gepräägt. Zanter Mäerz 2017 widmet hie sech intensiv dem Projet My Urban Piano.

En Artikel vum: Gabrielle Seil (Revue)
Fotoen: Leslie Schmit (Revue)