Mäin Numm ass „MS Princesse Marie-Astrid” an ech sinn dat fënneft vu menger Bluttlinn. Jo, Dir hutt richteg héieren: ech heesche wéi dat klengt Meedchen, dat mech deemools um 28. Mee 1966 gedeeft huet. 12 Joer hat déi frech Strutz, ma säin Titel huet eis Prinzessin awer och do scho mat vill Stolz an Éier gedroen. Ech versichen, him nozeäiferen. Schliisslech sinn ech d’Aushängeschëld vun der Lëtzebuerger Schëfffaart. Iwwregens: wousst Dir, datt d’Musel eréischt säit 1964 vu grousse Schëffer befuer gëtt? A jo, d’Kanaliséierung vum Floss war de Startschoss vum Reesen iwwer Waasser hei an der Regioun, ouni deen et mech haut guer net géif ginn. Ma scho bal zéng Joer virdrun haten d’Gemenge Rëmerschen, Wellesteen a Stadbriedemes d’Iddi, den Tourismus am Museldall nei unzekuerbelen. E grandiose Geeschtesblëtz, wann Dir mech frot!

Fuere kann een haut mat mir op vill Plazen an och thematesch gëtt et u mengem Bord esou muenches ze entdecken. Besonnesch beléift sinn déi Faarten, bei deenen et och eppes fir de Gumm gëtt. Mmm, geschmaacht hunn ech vun de regionale Spezialitéiten zwar leider nach ni, ma de Geroch vum Miseler Wäin an all deene gudde Platen aus dem Lëtzebuerger Land loossen och engem Schëff wéi mir d’Waasser am Mond zesummelafen (am iwwerdroene Sënn natierlech). Déi meeschte Leit zitt et awer sonndes u mäin Deck, well tëscht Ouschteren an Oktober fueren ech zu geregelten Zäiten ëmmer déiselwecht Streck. Vun Tréier iwwer Waasserbëlleg, ëmmer weider iwwer Gréiwemaacher a Richtung Schengen, geet et fir meng Gäscht laanscht d’Ufere vu Wuermer, Stadbriedemes, Réimech a Bech-Maacher. Ze gesi gëtt et virun allem eppes: Natur pur! Well – dat kann ech Iech garantéieren! – d’Wäibierger a kleng Dierfer un der Musel sinn net nëmme vu Land aus e Genoss. A nee, wien de Spirit vun der „Mousel” esou richteg fille wëll, dee muss sech scho bis op d’Waasser eraustrauen. Ech geheien och kee vu Bord, versprach.

Ech hunn awer och nach aner, méi besonnesch Trips ze bidden. Ob d‘Dënschdes-Croisière duerch d’Schengener Land, d’Rees an d’Vergaangenheet um Mëttwoch, d’Schlemmerfaart um Freideg oder speziell Ausflich a Richtung Bernkastel a Saarburg – mat mir entdeckt Dir Plazen op eng Manéier, wéi Dir se nach ni gesinn hutt! Dir kéint natierlech och mam Auto an all déi léif kleng Dierfercher fueren, ma wou wier dann do de Spaass? Hei loosst Dir Iech ganz gemittlech vun eisem Kapitän kutschéieren, a kënnt dobäi den Ausbléck einfach genéissen. Ei, do kritt een dach richteg Loscht op Vakanz!