Trotz all dësen Ustrengungen huet de ganze Secteur awer 40 Prozent vu sengen Abonnementer verluer. „Dat ass eng enorm Zomm. Et gëtt kee Fitnesszenter, deen an dëser Zäit net rout Zuele schreift“, nennt de Proprietär vun engem eegene Fitnessstudio d’Fakten. Dëse Verloscht vun den Abonnementer ass duerch verschidde Facteuren ze erklären. Ee Grond besteet sécherlech doran, datt d’Leit sech nei Alternative gesicht hunn, fir hire Kierper a Form ze halen. Si hu sech zum Beispill e klenge Fitnessstudio doheem ageriicht oder hu baussen am Bësch oder am Park op de Geräter trainéiert. Verschidde Persounen hunn an der Tëschenzäit awer och einfach eng ganz nei Passioun fir sech entdeckt, andeem se elo méi oft lafen oder Vëlo fuere ginn. Dëst sinn awer net déi eenzeg Beispiller, déi dësem Milieu ze schafe maachen. Den Teletravail huet och e groussen Impakt dorop, datt d’Zuelen erofgaange sinn. „Vill vun eise Clientë schaffen zu Lëtzebuerg, mee si wunnen net hei am Land. Wa se also vun doheem aus schaffen, beweege se sech och net op Lëtzebuerg, wat derzou féiert, datt se och net de Wee an eis Studioe fannen“, erkläert de Charel Trierweiler. Op där anerer Säit däerf een net vergiessen, datt déi verschidde Mesuren (2G-Reegel) vun der Regierung och hiert derzou bäidroen, datt d’Situatioun sech an dësem Domän net grad verbessert.

Eppes, wat sech awer – deels gezwongen – zum Gudden entwéckelt huet, ass, datt d’Kommunikatioun sech tëschent den eenzele Fitnessstudioe geännert huet. „Et gëtt sech vill méi ënnerteneen ausgetosch, wéi dat viru Corona de Fall war. E Konkurrenzdenke gëtt et net“, bestätegt de Charel Trierweiler. Ee Grond ass déi prekär – virun allem finanziell – Situatioun an dësem Secteur. Et sicht een zesummen no Léisungen, wéi een am beschten iwwer d’Ronne komme kann. De Charel Trierweiler huet dunn am Dezember 2020 d’Initiativ ergraff, fir jiddereen, deen an dësem Beräich schafft, mat an d’Bot ze huelen an eng Federatioun ze grënnen, sou datt een och um politeschen Niveau méi Gewiicht an Opmierksamkeet kritt. „Ganz am Ufank huet jiddweree vum Horeca geschwat, mee mir sinn och ënner déi Vulnerabel gefall. Fir eise Secteur war awer zu deem Zäitpunkt kee Ministère richteg zoustänneg“, erënnert hie sech. D’Problematik besteet doranner, datt d’Fitnesszentere mat Abonnementer funktionéieren. Am Verglach mat de Restaurante kënne si net op vill aner Alternative wéi den Online-Coaching zeréckgräifen, wa se zoumaachen oder méi kuerz triede mussen. Et ass also fir si méi schwéier, de selwechte Service fir hir Clientèle ubidden ze kënnen. „Et wäert warscheinlech nees Joren daueren, bis bei eis – wann iwwerhaapt – d’Normalitéit antriede wäert. Deejéinegen, deen net déi néideg Reserven opweises huet, kënnt an dësen Zäiten net méi iwwer d’Ronnen“, erkläert de lëtzebuergeschen Entreprener.