Dat éischt, wat ech gesinn, nodeem ech aus dem Auto klammen, ass net d’Musel oder e Schëff, dat säi Wee an de Fräizäithafe fonnt huet, mee e sougenannte „Kiosque à baguette“, deen zumindest deelweis mat Solarenergie bedriwwe gëtt. 24/24 kritt een hei artisanal franséisch Baguetten – domat hat ech elo net gerechent. Mäi Wee féiert mech dann eemol ronderëm den Hafen; lénker Hand leien eng sëllege Schëffer, riets hannert enger grénger Wand aus Beem héieren ech gedämpft d’Autoen op der Rue de la Moselle laanschtfueren. Et geet zweemol no lénks an ech hunn d’Musel riets niewent mer. Hei gesinn ech eng eeler Koppel virun hirem Camper stoen, mat där ech an d’Gespréich kommen. Si sinn elo fir d’zweet dëst Joer hei an et gefält hinne ganz gutt – virun allem de Mix aus Campingsplaz an Hafen. D’Koppel huet hir elektresch Vëloe mat dobäi a wëll elo eng Tour bis op Thionville maachen, wat ongeféier 30 Kilometer solle sinn. Ier se lassfueren, recommandéiert de Mann mir nach d’Moiesiesse „Sonnenopgang“ am Lokal mam Numm Liblingsplaz fir ronn 40 Euro fir zwou Persounen. Et géif ee wonnerbar uewen op der Terrass sëtzen an d’Iesse wär wuel sensationell.
Leit wéi dës Koppel sinn déi prototypesch Camper (a Vëlosfuerer), op déi ech ëmmer erëm treffen. Bis bei d’Schëffer kommen ech net, well den Zougang zu de Quaie mat enger Gitterpaart blockéiert ass, fir déi ech kee Schlëssel hunn. Dofir entdecken ech awer eng Schwanefamill mat hire fënnef Kanner, déi genee esou gemittlech duerch den Hafe schippert wéi d’Schëffer, déi eng kuerz Paus maache fir opzetanken. Ech wénken der Besatzung vun der Delfina zou, déi ursprénglech aus dem schweedesche Karlskrona ass – wéi se hire Wee op Lëtzebuerg fonnt huet, weess ech net.
Fir d’Mëttegiessen hunn ech Rendez-vous mat enger Frëndin am Restaurant Um Hafen, déi mëttlerweil zu Schwéidsbeng wunnt. De Restaurant, deen am Abrëll mat enger grousser, gemittlecher Terrass inklusiv Hafevue an engem komplett renovéierte Banneberäich nei opgemaach huet, bitt ënner anerem exzellent Spaghettie mat Scampien a Chorizo un. Ech kréien erzielt, dass et anscheinend e jonke Mann gëtt, dee säi Schëff zu engem Hausboot ëmfunktionéiert huet an elo fest um Hafe wunnt – eng interessant Wunnsituatioun!
Nom Iesse verschléit et eis op d’Ankerplaz, eng Aart Strandbar, déi hannert dem Restaurant läit a bei schéinem Wieder vu 16 bis 22 Auer ophuet. D’Barkonstruktioun besteet aus engem roude Schëffscontainer, deen uewe mat engem Surfbriet dekoréiert ass. Am Sand sinn holze Sëtz- a Ligeplazen. Hei um Schwéidsbenger Hafe spadséieren ech dëst Joer déi éischte Kéier mat plakege Féiss duerch de waarme Sand, dee mech frëndlech tëschent den Zéiwe këddelt. En onerwaarte Vakanzefeeling kënnt op, mir bestellen eis e Virgin Mojito, leeën eis an e Ligestull, vergiesse komplett d’Zäit. Wéi séier den Nomëtte passéiert ass, fält eis eréischt an deem Moment op, wou d’Sonn schonn déif steet.
Wat gëtt et Neies?
De Schwéidsbenger Hafen, deen deen eenzege vu senger Aart zu Lëtzebuerg ass (doniewent gëtt et nach de Mäerter Hafen, e Gidderhafen), gouf 1999 ausgebaut a stellt 220 Ligeplaze fir Fräizäitbooter a Yachten zur Verfügung – dovu sinn 12 Plaze fir Gaaschtbooter reservéiert. De ronderëm ugesidelte Camping waart mat ronn 18 Plazen op seng Visiteuren. Dat komplett Hafenareal huet eng Gréisst vun ongeféier sechs Hektar.
Zënter dëser Saison, déi den éischten Abrëll ugaangen ass, huet den Hafen en neie Bedreiwer. D’Schengener Gemeng, déi den Hafe véier Joer laang selwer geréiert huet, huet d’Gerance un en externe Betrib mat engem soziale Fokus ofginn (et handelt sech ëm eng sougenannten SIS: Société d’impact sociétal). D’Gesellschaft nennt sech Schengen Marina a gëtt domat gläichzäiteg dem Fräizäithafe säin neien Numm. De Ramon Hemmer, deen och den Direkter vun der ASBL Erliefnis Baggerweier ass, zielt zu de Matbegrënner vun där Societéit. Fir d’Verwaltung vum Hafe gi Mataarbechter vun dëser ASBL erugezunn, déi ënner anerem Leit mat enger Beanträchtegung beschäftegt. Weider gréisser Verännerunge sollen eréischt vun 2028 u mat der Konzipéierung vun engem neie Leitbild fir den Hafe kommen.
Eng rezent Ännerung besteet doranner, dass de sougenannte „Frëschmoart“ vun der Schengener Esplanad an den Hafe geplënnert ass. Dëse Maart hat zënter 2013 seng Plaz zu Schengen a war e Sammelpunkt fir Leit mat engem Interessi u regionale Produiten. A Form vun engem Hafemaart fënnt dësen „neie Moart“ säit dem 4. Juni all éischte Mëttwoch am Mount vun 9 bis 14 Auer statt. D’Iddi bleift dobäi déi selwecht: Produzenten aus Lëtzebuerg, Däitschland a Frankräich kréien eng Plattform gebueden, fir hir regional a saisonal Wuere wéi Uebst, Geméis, Kéis, Wäin, Wurscht, Blummen, Gebäck asw. unzebidden. D’Zil ass eng Weiderentwécklung vum Maart, deen net nëmme soll erhalen, mee och zu engem Begéinungsraum fir déi lokal Bevëlkerung an auslännesch Gäscht erweidert ginn.
D’Iddi, den Hafen zu engem Uert vun der gesellschaftlecher Begéinung auszebauen, huet hir nächst grouss Etapp den 10. August: Deen Dag fënnt de „Schengen Marina Festival & Classic Car Event“ vun 10 bis 22 Auer statt. Hei ginn iwwer 300 Oldtimer (oppe fir Gefierer bis 1992) ausgestallt – dorënner esouguer „Amphibienfahrzeuge“ –, Schëfffaarte si méiglech, et gëtt Musek, a verschidde Foodtrucken halen d’Leit bei Laun. Och un Aktivitéite fir d’Kanner ass geduecht ginn. Ween deen Dag nach näischt virhuet, ass invitéiert, sech selwer e Bild vum Schwéidsbenger Hafen ze maachen. A villäicht geet et Iech dann esou wéi mir an Dir vergiesst komplett d’Zäit op där Plaz.
En Artikel vum Heng Barone
