Un engem Strang zéien

De Christian Hahn war fréier President vun de Lëtzebuerger Jongbaueren a Jongwënzer. Hie gëllt als onofhängege Kandidat, well hien aktuell kenger grousser Baueregewerkschaft ugehéiert. Esou huet hien dunn och betount, datt et him wichteg wier, datt se alleguer un engem Strang zéien. Dës Ausso passt bei den ëmmer erëm vum Christian Hahn geäusserte Wonsch, d’Bauereverbänn zesummenzeleeën. Interessant ass dobäi, datt dës Virstellung allgemeng bekannt war an hien trotzdeem – oder vläicht grad dowéinst – als neie President gewielt gouf.

Am Virfeld vun de Wale si verschidden Iddie schonns an déi Richtung gaangen. Sou hat de Fräie Lëtzebuerger Bauereverband (FLB) de Wonsch geäussert, zesumme mat der Baueren-Allianz a Coop‑Allianz zwou ganz gemëschte Lëschten opzestelle mat Leit aus dësen Organisatiounen, awer och aus der Bauerenzentral, de Jongbaueren an dem Service Jeunesse. Dat huet awer wuel net jidderengem an de Krom gepasst, sou datt d’Bauere schlussendlech mat dräi Lëschten an d’Sozialwale gaange sinn.

D’Argumentatioun vun de Membere vun der Lëscht Zesumme méi staark war déi, datt viregt Regierunge mat der Landwirtschaft gemaach hätten, wat se wollten. Dacks wieren d’Gewerkschaften an och déi zwou Jugendorganisatioune géinteneen ausgespillt ginn. Dofir misst d’Landwirtschaftskummer zu allen Theemen erëm deen éischten Uspriechpartner ginn. Sou schreiwen d’Vertrieder vun der Lëscht am Virfeld vun de Sozialwalen: „Et kann net méi sinn, datt zu all Theema, wat usteet, op dräi verschiddene Plazen debattéiert gëtt an dann dräi Organisatioune bei d’Ministèrë pilgeren, fir da géinteneen ausgespillt ze ginn.“ Si schloe vir, zu all den Theemen, déi ustinn, Aarbechtsgruppen ze bilden, z. B. iwwer d’Waasserschutzzonen, d’Ammoniakreduktioun, d’Betribsiwwernam, d’Direktvermaartung, déi eenzel Produktiounssecteuren asw., déi da jeeweils sollte vun der Landwirtschaftskummer presidéiert ginn. „Mir mussen et an dëser Legislatioun fäerdegbréngen, fir d’Lëtzebuerger Landwirtschaft ze reforméieren, sou datt an Zukunft keng Regierung méi Decisiounen hëlt, déi laanscht eis ginn.“

D’Landwirtschaftskummer vertrëtt also déi politesch Interessie vun der Lëtzebuerger Agrikultur. Zu hiren Haaptaufgabe gehéiert awer och de Wëssenstransfert: d’Beruffsausbildung, d’Weiderbildung, d’Fachberodung an d’benotzerorientiéiert Fuerschung.

De Ministère a seng Annexen

Eng weider zentral Roll an deem Secteur kënnt natierlech dem Landwirtschaftsministère, sengen Annexen an Administratiounen zou, déi dorunner ugebonne sinn. Dat sinn zum Beispill d’Administration des services techniques de l’agriculture (ASTA), d’Administration luxembourgeoise vétérinaire et alimentaire (ALVA), den Office national du remembrement oder den Institut viti-vinicole – de Wäibauinstitut – fir nëmmen dës ze nennen.

Dobäi spillt jidder Institut eng präzis Roll an deckt e bestëmmte Beräich vun der Landwirtschaft of. D’Wäibauinstitut zum Beispill ass 1925 gegrënnt ginn, fir de Wënzer am Kampf géint Pilzkrankheeten a Schädlingen, déi deemools fir Problemer gesuergt haten, ënner d’Äerm ze gräifen. Och haut nach setzt dësen Institut sech an de verschiddene Facettë vum Wäibau a vum Wënzerberuff an.

Eng ganz aner Aufgab huet beispillsweis den Office national du remembrement. Seng Tâche besteet doranner, Terrainen, déi zersplittert oder verstreet sinn, no de Bestëmmunge vum „Flurordnungsgesetz“ nees zesummenzeleeën, fir méi eng wirtschaftlech Notzung vum ländleche Grondbesëtz ze erreechen.

Mee am Secteur vun der Agrikultur gëtt et niewent der Landwirtschaftskummer, de Gewerkschaften an de sëllegen ëffentlechen Institutiounen och eng Hellewull vun Organisatiounen, Genossenschaften an ASBLen, déi sech aktiv fir bestëmmten Interessien asetzen.