Curling vereent villes: Et muss een duerchaus sportlech sinn, eng gutt Kierperbeherrschung hunn, d‘Gläichgewiicht hale kënnen a flexibel sinn, strategesch denken, en Teamplayer sinn! Net fir näischt gëtt de Curling och als „Schach op Äis“ bezeechent. Och Elementer vu Petanque a Billard fënnt een am Sport erëm. Op där 44,5 Meter laanger Bunn gëllt et, déi eege Steng mat geziiltem Drécken engersäits, a mat geziiltem Wëschen anerersäits an den Zilkrees ze beweegen. Ee Spiller vun der Equipe dréckt de Curling-Stee mat ganzem Kierperasaz no vir, en zweete Spiller leeft virdrun a schruppt mat engem Biesem do, wou d‘Äis entdeet, fir doduerch eng méi rëtscheg Bunn fir de Curling-Steen fräizeschruppen, en drëtte steet am Krees, dem „Haus“, an dirigéiert d‘Team, wat amgaang ass ze schruppen.

Déi géigneresch Ekipp probéiert natierlech dat selwecht a kann dat och erreechen, andeem si de géigneresche Curling-Stee mat hirem eegenen aus dem „Haus“ erausstoussen.

Während engem Spillabschnitt, genannt „End“, léisst all Spiller zwee Steng iwwer d‘Äis a Richtung vum Haus rëtschen. Béid Ekippe wiessele sech mat hire Spillzich of. Dee Spiller, deen de Stee spillt, muss déi richteg Doséierung aus Vitess, Dréi-Impuls vum Steen a genauem Zile fannen. Esoubal all d‘Steng an engem End gespillt sinn, gëtt d‘Resultat festgehalen. Dono gëtt an déi aner Richtung vum Haus weidergespillt. Primäert Zil vum Spill ass, méiglechst vill vun den eegenen aacht Steng méi no un den Zentrum vum Haus ze bréngen ewéi dem Géigner säi beschtplatzéierte Steen. Fir all déi Steng gëtt et e Punkt. Wien um Enn vum Spill déi meescht Punkten huet, gewënnt.

Am Prinzip also en einfacht Spill. Mee d‘Subtilitéit läit am Detail! Dat flottst ass: Jidderee kann ufänken a Spaass hunn. Fir a Concoursen Erfolleg ze hunn, muss du awer scho ganz vill Wëssen an Erfarung uwenden. „Wéi dréien ech de Steen, wéi wëschen ech, wéi berechnen ech d‘Kéieren an de Wenkel?“, erkläert d‘Karen Waters.