Et richt e bëssen no Gummi an no Ueleg, wéi den Änder Ferrari, zanter 2 Joer President vum CNVH, mir moies kuerz virun 9 Auer d’Dier opspäert a mech eraléisst an dësen Tempel vun de Klassiker aus der Automobilwelt. Säi Veräin huet ronn 150 Memberen, déi d’Geleeënheet kréien, hiren ale Bijou hei op der Plaz auszestellen, wat iwwer de Wanter meeschtens kee Problem ass, mee am Summer wëllt natierlech jiddwereen alt emol e puer Sprëtztoure maachen, esouwäit den Auto nach op der Strooss kann ugemellt ginn. Fir d’Aarbecht op der Plaz ass den Änder Ferrari zesumme mat 13 Mataarbechter zoustänneg, déi alleguer dobäi kee Rouden a kee Wäisse verdéngen, mee alles fräiwëlleg an onentgeltlech maachen.

De Musée ass an engem geschichts­trächtegen Haus ënnerbruecht, am fréiere Garage Jean Wagener, wou an der Zäit emol eng Kutschefabrik war an duerno – duerch déi perséinlech Bekanntschaft vun der Famill mam Karl Benz – déi alleréischt auslännesch Vertriedung vun der Mark Mercedes-Benz. De Veräi selwer ass am Joer 1997 gegrënnt ginn dank der Hëllef vun de Sponsoren, op éischter Plaz d’Famill Meris-Wagener, doniewent awer och d’Gemeng Dikrech an de Lëtzebuerger Staat.

Den Ament si 35 verschidden Autoe vum Club vun der Gebuertsstonn vum Automobil bis an d’70er-Joren do ausgestallt, vun deene wuel den Delaunay Belleville ee vun deene wäertvollsten dierft sinn; hien gëtt op 150.000 bis 200.000 Euro geschat. Mee dernieft stinn awer och nach eng sëllegen aner flott a rar Maschinnen do ze blénken. Dës Autoe ginn no engem Rotatiounsprinzip ausgewiesselt, sou datt de Conservatoire iwwer Joren eraus attraktiv ka bleiwen. Grondsätzlech huet d’Ausstellung eigentlech zwéi verschidde Voleten: Niewent de Klassiker vum Veräin gëtt och nach ëmmer eng flott thematesch Ausstellung organiséiert. Den Ament an nach bis den 1. Mäerz sinn dat besonnesch Modeller vun der Kultmark