Si ass hir Stëmm bei de legislative Prozeduren an, an de sozioekonomeschen Institutioune vum Land.

Missiounen an Aktivitéiten

D’CSL verteidegt d’Interesse vun de Salariéen, de Léierbouwen, de Léiermeedercher an de Pensionnairen.

Si ass en offiziellt Berodergremium am Zentrum vun de legislative Prozeduren. D’Interventioun vun der CSL an de Gesetzesprojeten, déi an hir Zoustännegkeet falen, ass e weesentlecht Element vun der Lëtzebuerger Demokratie. All Joer formuléiert d’CSL ronn 90 Avisen zu Theemaen an de Beräicher Ekonomie, Soziales, sozial Sécherheet, Educatioun a Beruffsausbildung. Op dësem Wee verteidegt si d’Liewensqualitéit, d’Kafkraaft, d’Rechter an d’sozial Acquise vun deene Leit, fir déi se verantwortlech ass.

Duerch d’Nominatioun vu Personalvertrieder bei der Gesondheetskeess (CNS), der Pensiounskeess (CNAP) a bei de juristesche Prozeduren iwwer Aarbecht a sozial Sécherheet, schützt d’CSL d’Interesse vu senge Salariéen.

Och eng Rei Vertrieder, déi als Assesseure beim Aarbechtsgeriicht zu Lëtzebuerg mat derbäi sinn, gi vun der CSL virgeschloen fir d’Interesse vun de Salariéen ze vertrieden. Si ass natierlech och a verschiddene konsultative Kommissioune vertrueden, fir do d’Interesse vun de Salariéen ze vertrieden.

D’CSL ass e sozioekonomeschen Think Tank.

Ofgesi vun hirer konsultativer Funktioun, developpéiert d’CSL sozioekonomesch Dossieren op nationalem an europäeschem Niveau, fir esou d’Positioun vum Salarié an de makrosoziale Rapporten méiglechst objektiv duerzeleeën an domat d’Positioun vun der Legislativ an der Exekutiv ze beliichten. Dofir organiséiert d’CSL och gratis Diskussiounsronnen iwwer d’Aarbechtswelt.

D’CSL informéiert iwwer d’Aarbechtsrecht an iwwer d’Aarbechtswelt.

Op der Internetsäit vun der CSL kann ee Publikatiounen iwwer d’Aarbechtsrecht, d’sozial Sécherheet a d’Steierwiese gratis eroflueden.

Déi meescht Publikatioune sinn zweesproocheg.

D’CSL setzt sech ganz besonnesch fir d’Gesondheet, d’Sécherheet an d’Wuelfillen op der Aarbechtsplaz an.

En Deel vun den Aktivitéite vun der CSL ass virgesinn, fir eng Preventiounskultur ze erschafen an Aktivitéiten am Interessi vun der Gesondheet, der Sécherheet an dem Wuelfillen ze developpéieren. Si sensibiliséiert d’Salariéen an och d’Employeuren iwwer d’Enjeuxe vum Wuelfillen op der Aarbecht.

Si huet en Index iwwer d’Aarbechtsqualitéit an d’Wuelfillen op der Aarbecht ausgeschafft: de Quality of Work Index, en Index, deen hëlleft, d’Evolutioun vun den Aarbechtsbedéngungen an der Aarbechtsqualitéit zu Lëtzebuerg ze evaluéieren. Doriwwer eraus bitt si eng Hëllef fir Affer vun Aarbechtsstress iwwer de Service Stressberodung.