Moies mécht een d’Dier vu sengem Camper oder d’Tirett vu sengem Zelt op. Den éischte Bléck riicht sech op e schéine Floss, op e Bësch oder e Feld. Et ass dat onbeschreiflecht Gefill, an der Natur ze erwächen, wäit ewech vum Alldag, ouni Kalenner an ouni Verpflichtungen. Et ass dat Gefill vu Fräiheet, dat vill Camper sichen an dacks och fannen.

Iergendwéi huet een den Androck, datt dëst Striewen no Fräiheet an Naturverbonnenheet an de Joren nom Ophiewe vun de strenge Restriktioune vun der Corona-Pandemie nach vill méi staark ginn ass. Campen ass also voll am Trend. Dobäi brauch Lëtzebuerg sech mat sengen iwwer 50 Campingsplazen net ze schummen. Ganz am Géigendeel. An dat sinn och just déi Plazen, déi am Daachverband vun de Campingbesëtzer Camprilux registréiert sinn. Dobäi ginn et hei am Land nach wäitaus méi Campinger.

Jiddefalls hunn d’Campingbesëtzer sech an hirer Bilanz op déi lescht Saison ganz zefridde gewisen. De positiven Trend vun 2022 konnt sech weider fortsetzen. Virun allem an de Méint Mee a Juni hätte si iwwerduerchschnëttlech vill Buchunge gehat, wat ënner anerem mam immens gudde Wieder an de ville Feierdeeg an där Zäit géif zesummenhänken. Am Juli an August war d’Wieder net sou gutt, mee dat konnt d’Camper awer net wierklech verschrecken, sou d’Camprilux an hirer Bilanz. Zwar wiere muncher méi fréi ofgereest, mee direkt wieren déi Plaze vun neie Clientë besat ginn. De waarme Spéitsummer am September bis wäit an den Oktober eran hätt dëser positiver Bilanz weider an d’Kaarte gespillt.

Lëtzebuerg géif och ëmmer méi attraktiv gi fir Camper, well d’Touristen hei ëmmer méi Wander- a Vëlosweeër fannen. D’Camprilux nennt als Beispill den neie „Mëllerdall-Trail“ an de „Lee-Trail“ vun Ettelbréck op Kautebaach, déi immens beléift wieren. Och de Klimawandel géif Lëtzebuerg als Vakanzendestinatioun ëmmer méi interessant maachen. An de südleche Länner ass et an de leschte Summeren ëmmer méi waarm a dréche ginn. Oft sinn dës Länner grad an der Haaptsaison geplot mat Bëschbränn, Iwwerschwemmungen an anere Klimakatastrophen. Doduerch gewënnt dat manner extreemt Klima zu Lëtzebuerg un Attraktivitéit, sou d’Erklärung vum Daachverband.

Ureese kann ee mat senger Rulott, sengem Camper oder Auto mat Daachzelt. Oder ganz klassesch mat engem einfachen Zelt. Ween näischt esou eppes huet, fënnt op ville Campingsplazen Holzchaleten, Tipi- a Beduinenzelter, Wanderhütten oder grouss Wäifässer, an deenen ee schlofe kann. Der Fantasie si bal keng Grenze gesat.

Munch Campinger leien einfach nëmme matzen an der Natur an zéien déi Leit un, déi esou eng Lag genéisse wëllen. Op där anerer Säit ginn et awer och Campingsplaze mat Animatioun fir d’Kanner, grousse Spillplazen an esouguer Live-Showen a Concerte fir déi Grouss. Munch Plazen hu souguer Wellnessariichtungen oder beglécken de Visiteur mat enger Schwämm. Dës Campinger si besonnesch bei Famille mat Kanner immens beléift.

Fir datt keen den Iwwerbléck verléiert, huet de Ministère fir Wirtschaft a Mëttelstand am Joer 2018 Klassifikatiounen agefouert. Iwwer 180 Krittäre sollen den Tourist doriwwer informéieren, a wéi enger Kategorie e Camping sech befënnt. Jee no Lag, Ausstattung, Propretéit a Servicer kann e Camping ee bis maximal fënnef Stäre kréien. Jee méi Stären eng Plaz huet, desto méi déif muss de Client dann och an de Portmonni gräifen.

À propos Portmonni: Campe mécht een normalerweis net onbedéngt, fir Suen ze spueren, mee éischter aus Iwwerzeegung. Zum Beispill, well ee gären an der Natur ass an déi méi einfach Saachen am Liewe sicht. Et ass een och manner anonym ënnerwee wéi beispillsweis an engem Hotel. Séier huet een op engem Camping Kontakter geknëppt, wat besonnesch och fir d’Kanner interessant ass, well si séier nei Frëndschafte kënne fannen. An de leschte Joren huet sech dann och e weideren Trend duerchgesat, dee vum Glamping. Dat Wuert setzt sech zesummen aus den zwee englesche Wierder glamourous a Camping. Glamping schwätzt dann éischter déi Leit un, déi hire Weekend oder hir Vakanz gären an der Natur verbréngen, ouni awer op e gewëssene Confort oder Luxus ze verzichten.