35 Prozent vun der Lëtzebuerger Populatioun waren am Joer 2022 als Benevollen aktiv. Ronn 228.500 Leit am Land, déi der Etüd Nr. 10 09/2024 vum Statec no méi glécklech sinn, well laut de Befrote mécht et frou, sech fir anerer ze engagéieren. Mat dësen Zuele läit de Grand-Duché op Plaz 4 an Europa, wat de Benevolat ugeet, a kann houfreg op sech sinn. Virun allem am karitative Beräich, ma och a Sportsveräiner gëtt sech vill engagéiert. Déi, déi hir Fräizäit hierginn, fir a Veräiner an Organisatiounen ze hëllefen, sinn zwar oft schonn iwwer 60 – an der Pensioun huet een eeben Zäit –, ma direkt no dëser Grupp kënnt déi vun de Jonken, also deenen am Alter tëscht 16 a 25 Joer.

Beim Benevolat gëtt dobäi ënnerscheet tëscht deem, wat een op Däitsch géing „Ehrenamt“ nennen, also dem Engagement an der Fräizäit, wat net forcement op eng gewëssen Dauer fixéiert ass, mee oft oppe gestalt gëtt, jee no Verfügbarkeet, an dem sougenannte Fräiwëllegendéngscht, dee meeschtens iwwert en definéierten Zäitraum leeft, e fixe Kader huet a vollzäit ass. Zanter 2002 gëtt et zu Lëtzebuerg fir déi éischt Kategorie d’Agence du bénévolat, déi iwwert hir Websäit benevolat.lu säit 2022 eng Plattform fir vill verschidden Aktivitéiten a Missioune bitt. Ugangs Mee hunn hei Lëtzebuerger Veräiner, Organisatiounen, Agencen a Fondatioune fräiwëlleg Hänn fir iwwer 80 Missiounen gesicht. Wat se all gemeinsam hunn: Et engagéiert een sech mat senger Zäit, sengem Wëssen a Kënnen, an dat, well een et wëll, well fir d’Benevolat gëtt et keng Bezuelung.

Gesicht gi Leit, fir punktuell bei Eventer ze hëllefen – beim Op- an Ofbau, hannert dem Comptoir oder am Backstage –, a Veräiner als Sportstrainer oder, fir bei administrativen Tâchen ze ënnerstëtzen, Kanner a Jugendlecher bei Aktivitéiten ze encadréieren, am Déierenasyl eng Hand mat unzepaken, eelere Leit bei digitale Froen ze hëllefen, an enger Hörbibliothéik Bicher an- a virzeliesen, krank Leit op hirem leschte Wee ze begleeden an, an, an. Wien also gär eppes géif bäidroen a gewëllt ass, sech ze engagéieren, dee gëtt schnell fündeg, well de Choix ass definitiv grouss. D’Plattform funktionéiert dobäi a béid Richtungen: Associatiounen, déi Fräiwëlleger sichen, kënnen hei hir Offere posten, an Interesséierter kënne mat geziilte Krittären no dem perfekten „Job“ fir sech sichen –  a mat Job ass, wéi uewe scho betount, keng bezuelten Aarbecht gemengt.

Eng vun den Organisatiounen, déi och reegelméisseg no Benevolle sicht, ass natur&ëmwelt. Jee no Alter kënne Jonker sech an ënnerschiddleche Beräicher engagéieren, esou d’Claudine Felten, Directrice vun der ASBL: „Ënner 18 Joer ass dat just am Kader vun organiséierten Aktivitéiten, z. B. an eisem Jugendgrupp méiglech. Hei bidde mer flott Aktivitéite fir Jugendlecher un, fir d’Natur ze entdecken a sech zesummen ze engagéieren. Sou hate mer d’lescht Joer z. B. de Bioblëtz-Weekend, bei deem et drëm gaangen ass, sou vill verschidden Aarte vun Déieren, Planzen a Pilze wéi méiglech innerhalb vu 24 Stonnen ze entdecken.“

Och am „Beringungscamp“ fir d’Berénge vu Villercher oder bei der Moukewanderung ass Plaz fir jonk Benevollen, déi esou direkt am Déiereschutz eng Hand mat upaken. Fir Jonker iwwer 18 Joer, déi sech wëlle fir den Naturschutz organiséieren, huet natur&ëmwelt den Ament leider keng Aktivitéiten, mee, esou d’Directrice: „Mir brauchen awer ëmmer Hëllef op eise Stänn bei Fester, fir Kanneraktivitéiten, Memberswerbung oder einfach do, wou Nout um Mann oder un der Fra ass.“ Och bei de verschiddenen Aktivitéite vun de lokale Gruppe vum Veräin ass Ënnerstëtzung wëllkomm. Interesséierter kënnen sech gär iwwert de Kontaktformulaire um Site mellen.