Am Guttland geleeën ass dësen en einfache Wee, adaptéiert fir Famillen an/oder Leit mat ageschränkter Mobilitéit.
D’Andauchen an de Bësch geet direkt hanner der Spillplaz „Bei der Bonnert“ lass. Dir spadséiert hei ganz bequeem laanscht d’Waasser iwwer gutt stabiliséiert Weeër, mat ville Bänken, fir sech och emol auszerouen.
De Wee huet weider keng Uspréch, ausser eng Steigung vun 10-18 % op enger Längt vun 100 Meter. Hei ass et recommandéiert, datt eng Persoun am Rollstull begleet ass.
Am Oste vum Land op der Musel gëtt et en aneren einfachen an accessibele Wee duerch d’Gässelcher vum Duerf, duerch de Park Jeannot Belling an iwwer d’Esplanad mat Bléck op d’Musel vu Réimech a Richtung Stadbriedemes. Dir kënnt och méi wäit goen an en Tour mam Schëff maachen, fir d’Regioun ze entdecken – zum Beispill mat der Marie-Astrid. Ënnerwee ginn et vill Plazen, fir sech ze setzen an et ass zimmlech flaach.
Um Iechternacher Séi hu mer nach en einfache Wee, ëmgi vu Bëscher.
Laanscht de Wee si vill Spillplazen, mat esouguer enger Klunsch fir Rollstill. Am Summer ass en Deel vum Séi op fir ze schwammen an et kann een och Pedaloe lounen.
Op der schéiner Musel gëtt et e weideren einfache Wee laanscht de Floss.
De Parcours ass breet a geet net méi wéi 10 % biergop. En ass tipptopp fir Famillen, eeler Leit oder Leit mat ageschränkter Mobilitéit. Och hei gëtt et um Wee laanscht d’Musel eng Klunsch fir Rollstill. De Wee geet weider laanscht de Kulturhuef, de Lëtzebuerger Musée vun der Dréckerei an der Spillkaart, an da bei de Päiperleksgaart.
Et ass déi ideal Plaz fir d’Frënn vun der Natur a vun hire Schéinheeten. Den tropesche Gaart invitéiert fir Spadséiergäng op enger Fläch vu méi wéi 600 m2.
Mat enger konstanter Temperatur vun 28 °C a 70 bis 80 % Loftfiichtegkeet ass den tropesche Gaart fir d’Päiperleken aus der ganzer Welt an aner Déieren ewéi chineesesch Zwergwachtelen, Chamäleonen, Deckelsmouken, verschidde Villercherszorten an e Beievollek eng paradisesch kleng Insel op der Musel.
Weider an der Natur, nëmmen e puer Schrëtt vum Escher Stadzentrum ewech um Gaalgebierg, waart eng idyllesch Welt op Iech. Hei gesäit een zwar vill Déierenaarten, an awer ass et keen Zoo: D’Déiere si weeder an engem Käfeg agespaart, nach aus hirem natierlechen Ëmfeld erausgerappt.
Am Ganze 25 verschidden Déierenaarten an 150 Déiere ginn et hei ze beobachten.
Daucht an an déi faszinant Welt vum Drénkwaasser!
Waasser ass liewenswichteg. Dofir rentéiert et sech, de 55 Meter héijen „Aquatower“ zu Bäerdref kucken ze goen. Hei informéiert eng Ausstellung mat verschiddenen interaktive Statiounen iwwer d’Theema „Waasser a Geologie“. Eng ganz besonnesch Attraktioun ass déi 50 Meter héich Aussiichtsplattform, op déi ee kann eropfueren.
Gesinn, Héieren, Taaschten, Richen a Schmaachen: Ronderëm dës fënnef Sënner vum Mënsch bitt de Fräizäitzentrum Park Sënnesräich senge Visiteuren eng villfälteg Offer.
De gliesene Panoramalift verbënnt deen am ieweschte Stadzentrum geleeëne Park Pescatore an de Quartier Pafendall am Uelzechtdall. De Lift, mat senger Glaskabinn, bitt eng eenzegaarteg Panoramavue ‒ virausgesat, et huet ee kee Problem mat 71 Héichtemeteren.
Matten an engem entspanenden historesche Park läit, am Häerz vun der Stad, d’Villa Vauban. Déi representativ Stadvilla vun 1873 steet op Fundamenter, déi nach aus Zäite vun der Festung stamen.
Se gouf moderniséiert an an den 2000er-Joren opwänneg renovéiert. De Musée weist verschidden Ausstellungsformater ronderëm déi eege Sammlungen (europäesch Konscht aus dem 17. bis 19. Joerhonnert a Lëtzebuerger Konscht vum 20./21. Joerhonnert).
Loosst Iech vun dëser eenzegaarteger Sammlung vu Fotoen inspiréieren, déi d’Liewen, d’Kulturen an d’Emotioune vun der Mënschheet a Biller afänkt!
Mat iwwer 10 Millioune Visiteuren zënter hirer Ouverture ass déi weltberüümt Fotoausstellung „The Family of Man“ eng Legend an der Geschicht vun der Fotografie. D’Sammlung ëmfaasst am Ganze 503 Opname vun 273 Fotografen aus 68 Länner.
An dat ass nëmmen eng Auswiel vu villen anere flotten Aktivitéiten …
En Artikel vum Tania Hoffmann