Eréischt duerch hie gëtt de Graffiti hei am Land esou richteg bekannt a fënnt seng Plaz a Konschtgalerien, awer och op aneren, deels aussergewéinleche Plazen.

E Gespréich mam SUMO a sengem Alter ego Christian Pearson iwwer Schmiererei, Konscht, an en aussergewéinleche Personnage:

Vill Leit kennen de SUMO als Graffiti-Kënschtler! Mee ass de SUMO net vläicht méi ewéi nëmmen een, deen d‘Spraydous emol an de Grapp hëlt?

Christian Pearson:
De Sumo bezeechent sech scho laang net méi als Graffiti Sprayer obwuel hien och mat Spraydouse schafft. Haut moolt hie Biller op Toile. Dës hunn net als Ziel Graffiti z’illustréiere mee de Sumo benotzt déi visuell Sprooch an d’Energie dovu fir sech auszedrécken. De roude Fuedem ass Zäit a Raum. D‘Toile gëtt zu engem Tagebuch wou Zäit dokumentéiert gëtt. D’Biller si wéi Extraite vu Biller déi onendlech méi grouss sinn. Theoretesch kéint een an all Bild weider eran zoomen an nei Detailer entdecken.

Vill Leit gesinn haut Graffiti nach ëmmer als Schmiererei an net als Konscht. Wat mécht de Graffiti da schlussendlech zur Konscht?

SUMO:
Graffiti ass fir mech keng Konscht mee éischter e Lifestyle an eng zimmlech komplex Kultur fir sech. Et geet net nëmmen drëm Spraydousen ze benotzen oder säin Numm op d’Mauer ze schreiwen. Als Graffiti Writer hëlt een säin Ëmfeld anescht wouer, de ganzen Alldag dréit sech ëm Graffiti, et plangt een seng Missiounen, recherchéiert Stiler, analyséiert den Espace Public, et schwätzt een a Coden, asw. Alles heemlech well et hei net ëm d’Persoun geet mee ëm e Resultat. Wat fir de Grand Public als Schmiererei bezeechent gëtt ass de Grondstee vum Graffiti, ‘Writing’ oder ‘Bombing’. Propper an detailléiert Biller op Maueren a „Murals“ ginn an der Zeen net onbedéngt als gutt empfonnt. Am Graffiti ass ’Style’, Originalitéit oder eng Approche méi wichteg wéi eng propper Technik. Just deen deen aus der Mass eraussteet kritt de Respekt. Bref, dat hei ass just d’Spëtzt vum Äisbierg an et ass relativ schwéier fir en Aussestoenden ze verstoen. Dat wat ech perséinlech um Graffiti schéi fanne gëtt héchstwarscheinlech iwwersinn oder verflucht an dat wat als ’schéin’ empfonnt gëtt ass fir mech onwichteg oder Dekoratioun.