De Service Info-Handicap, ënner der kompetenter Leedung vum Christine Zimmer an der Verwaltung vum Conseil d’administration vun der ASBL, ass de Kontakt fir all Är Froen a Problemer am Beräich vum Handicap. Als Informatiounsplattform ass et dem Service seng éischt Aufgab, all d’Informatiounen aus dem Beräich vum Handicap ze sammelen an accessibel ze maachen, sou datt jiddereen déi aktuell an zouverlässeg Informatioune ka fannen a kompetent Äntwerten op seng Froe kritt. An deem Sënn gouf eng Cellule de communication opgebaut. Si bereet d’Informatiounen op an diffuséiert se um Internet, an de soziale Medien a Broschüren esouwéi ënner anerem och op Sensibiliséierungsevenementer, fir se esou engem breede Public zougänglech ze maachen. D’Sensibiliséierung vu méiglechst ville Leit ass e wichtege Bestanddeel vum Wee an eng inklusiv Gesellschaft.
All Joer komme per Telefon a Mail vill Ufroen eran, wou et ëm ganz konkreet Problemer aus dem Alldag vu Leit mat spezifesche Besoine geet. Ëm vill vun dësen Ufroe këmmert sech de Service d’information et de conseil vun Info-Handicap. Hei ginn d’Ufroe beäntwert, gesammelt an ënnersicht, et gëtt op kompetente Plazen no weideren Informatiounen iwwer d’Dossiere gefrot a mat de Concernéierte gekuckt, wéi se solle weider virgoen. Dësen Deel vun der Aarbecht vun Info-Handicap léisst erkennen, ob et a verschiddene Beräicher e generelle Problem gëtt a wou méi genee muss nogekuckt ginn, fir Léisungen ze sichen an ze proposéieren.
Weider Aufgabe vum Centre d’information et de rencontre du handicap sinn d’Accessibilitéit an d’Formatioun. De Label EureWelcome kënne Restauranten, Commercen, ëffentlech Sitten asw. ufroen, fir esou no bausse visibel ze maachen, datt si gewëssen Accessibilitéitskrittären erfëllen. Um Site Eurewelcome.lu an an der App kann ee sech iwwer d’Etablissementer mat dësem Label informéieren a sech drop verloossen, datt een als Persoun mat Beanträchtegungen a mat spezifesche Besoinen do gutt opgehuewen ass. Eng Facette vun der Accessibilitéit, niewent der Sensibiliséierung, ass d’Formatioun. De Centre d’information et de rencontre du handicap bitt eng ganz Rei vu Formatiounen un, fir datt ee ka léieren, mat der Thematik vum Handicap och an der Praxis ëmzegoen. Sou forméiert Info-Handicap all Joer ënnert anerem eng Partie vun de Buschauffere vun der Stad Lëtzebuerg an d’Zuchbegleeder vun den CFL, fir hiren Ëmgang mat Leit mat Beanträchtegungen ze verbesseren. Et geet net duer, accessibelt Material ze hunn, et muss een och den Ëmgang mam Material léieren an och, wéi ee mat verschiddene spezifesche Besoine ka kompetent ëmgoen.
Info-Handicap bitt also eng ganz Panoplie vu Servicer an Hëllefen un. Mee et ginn och Saachen, déi net esou einfach kënne geléist ginn. Do ass heiansdo laangen Otem gefrot an den Aktiounsradius ass éischter um politeschen Niveau ze gesinn. Do kënnt dann de Conseil d’administration a senger Funktioun vum Conseil national des personnes handicapées (CNPH) an d’Spill. Dësen ass a reegelméissegem Kontakt mat de verschiddene Ministèren, fir am Dialog mat der Politik Léisungen an deenen Dossieren ze sichen, wou déi aktuell Reegelungen éischter eng Barriär sinn. Dëst heescht vill Hin an Hier vun Argumenter, Erklärungen a Léisungsvirschléi, fir an engem Dossier virunzekommen. Ee vun den aktuellen Dossieren ass zum Beispill den Adapto. Duerch vill Reuniounen, Echangen a Bréiwer ass scho vill Positives an dëser Thematik geschitt, an Info-Handicap bleift drun, fir derzou bäizedroen, dëse wichtege Service weider ze verbesseren. An esou gëtt et eng Rei vun Dossieren, bei deenen de CNPH ëmmer erëm gefuerdert ass, fir sech fir d’Rechter vun de Persoune mat Beanträchtegungen anzesetzen.
An och 2025 wäert en aktiivt Joer gi mat der Evaluatioun vum zweeten Aktiounsplang fir d’Ëmsetze vun der Behënnerterechtskonventioun souwéi dem Ausschaffe vum drëtten Aktiounsplang, bei deem den Knowhow an d’Matschaffe vu jidderengem gefuerdert ass.
En Artikel vum Patrick De Rond
