A fréieren Zäiten huet d‘Aarbechtsagentur nach „Administration de l’emploi“, an anere Wierder Aarbechtsamt, geheescht. Zanter der Reform am Joer 2012 ass dat awer net méi de Fall. Vun dësem Moment un ass se op ADEM ëmgedeeft ginn. Ee Joer drop gouf et e Wiessel un der Spëtzt. D’Isabelle Schlesser gouf als Direktesch virgestallt. Mat dëser neier Direktioun goufe vill Ëmstrukturéierungen ënnerholl. D’ADEM huet sech zu engem Referenzpartner fir all d’Acteuren um Aarbechtsmaart entwéckelt.

Hir Haaptaufgab ass et sécherlech, dofir ze suergen, datt deejéinegen, deen op der Sich no Aarbecht ass a sech bei hinne gemellt huet, esou séier ewéi méiglech erëm an den Aarbechtsmaart integréiert gëtt. Dofir ginn d’Bedierfnesser vun den eenzele Persoune méi staark berücksichtegt, ewéi dat virun der Reform de Fall war. Wat der betraffener Persoun hire Profil méi detailléiert ass, wat déijéineg et méi einfach bei der Jobvermëttlung kritt.

Wéi een aus de Joresbilane vun der ADEM erausliest, hunn déi nei Mesure Friichte gedroen. Dat gesäit een, wann een op d’Zuelen kuckt. D’Aarbechtslosequot ass an de Joeren no der Reform quasi all Joer e Stéck erofgaangen. Vun 7,1 (2013) ass se bis op 5,8 Prozent (2018) gefall. 2019 (6,1 Prozent) an 2020 (6,4 Prozent) goung dës Zuel deels covidbedingt nees liicht an d’Luucht fir dann am Joer 2022 nees op 4,8 Prozent ze falen. 

Virun allem mécht d’ADEM elo méi Ustrengunge fir Leit, déi op Aarbechtssich sinn. D’Aschreiwungsprozedure kënne nach méi séier gemaach ginn. D’Leit, déi eng nei Aarbecht wëllen, mussen e Formulaire am Internet ausfëllen. Doropshi kréien si e Rendez-vous an eng Lëscht mat Dokumenter geschéckt, déi se da matbrénge sollen. Eng hallef Stonn kritt dann all Demandeur zur Verfügung gestallt, wou hie bei dëser Geleeënheet dovu profitéiere soll, seng Qualitéiten ënner Beweis ze stellen. En plus huet d’ADEM op hirem Internetsite, deen op Däitsch, Franséisch an Englesch verfügbar ass, eng Funktioun Jobboard an d’Liewe geruff. Dat ass eng Plattform, déi d’Demandeure kënnen duerchbliederen, fir no fräie Plaze fir en Job ze kucken.

Vun enger spezieller Behandlung profitéiere Leit am Alter tëschent 16 an 29 Joer, déi vun der sougenannter Jugendgarantie Gebrauch kënne maachen. Dës Mesure versprécht hinnen zwar net automatesch eng Aarbechtsplaz, mee si garantéiert hinnen eng perséinlech Begleedung, déi sech ganz speziell un hirer individueller Ausgangslag orientéiert. Op dësem Wee sollen si op déi richteg Spuer am Beruffsliewen fannen.

Mee et goufen och Ustrengunge fir d’Employeure gemaach. Esou krut de Patron, dee bei der Aarbechtsagence eng oppe Plaz umellt oder soss en Uleies huet, ee konkreeten Uspriechpartner. Dat war an der Vergaangenheet net esou. D’Employeure spillen nämlech fir d‘Aarbechtsagence eng wichteg Roll als Partner. Esou gëtt mat der Handelskummer, der Handwierkerkummer an der UEL (Union des Entreprises Luxembourgeoises) enk zesummegeschafft.