Mëtt vun den 30er Jore gëtt d‘Haaptschëff vun der Kathedral vergréissert, en neit Klackespill mat am Ganze 37 Klacken installéiert an niewent dem Haapttuerm, deen op dësem Karfreideg am Joer 1985 verbrenne sollt, en zweeten Tuerm héichgezunn. De Brand am Joer 1985 war awer net déi éischt Katastroph, déi dësen Tuerm matmaache sollt. Schonn am zweete Weltkrich 1945 gëtt d‘Spëtzt vum Tuerm duerch e Volltreffer vun der däitscher Arméi zerstéiert.

Géint Véirel vir zwou, op dësem 5. Abrëll 1985 kommen d‘Aarbechter, déi mat Léit- a Schweessaarbechten am Tuerm beschäftegt waren, aus hirer Mëttespaus zeréck an entdecken e Feier am alen Tuerm. Kuerz no 2 Auer scho sinn d‘Stater Pompjeeë mat hirem ganze Material op der Plaz, fir d‘Feier ze läschen. Dës ginn sech schnell bewosst, datt den Tuerm wäert an de Koup falen a verleeë schnellstméiglech hir Schläich aus der Ënneschtgaass a Richtung Kathedral, fir d‘Feier vun dëser Säit aus ze bekämpfen an ze verhënneren, datt d‘Feier op d‘Haaptschëff vun der Kathedral an d‘Nationalbibliothéik iwwergräift. Iwwer Funk gëtt Ënnerstëtzung ugefuerdert, a kuerz drop sinn och d‘Protection civile an déi fräiwëlleg Pompjeeën aus der Ëmgéigend op der Plaz. Mëttlerweil schloen d‘Flame schonn aus dem Gemaier vum Tuerm an d‘Hëtzt hënnert d‘Pompjeeën drun, no genuch un d‘Feier ze kommen, fir et ënner Kontroll ze kréien! Duerch e Kuerzschluss ertéint d‘Klackespill nach eng leschte Kéier, éier den Tuerm géint hallwer dräi zesummefält. En Deel vum Gespär fält duerch den Daach vun der Kathedral an d‘Mëttelschëff eran, aner Deeler falen op den Daach vum Ausseministère an et gëtt gefaart, datt hei en zweet Feier entsteet.