„Mir probéieren, d’Schüler op eng selbstänneg Karriär ze preparéieren“, seet de Christian Boudot, deen déi jonk Leit mat senge Proffekolleege betreit. D’Méiglechkeete fir eng Festustellung wieren am Moment net ideal. Zwar hätten auslännesch Spillentwécklungsfirme probéiert, sech zu Lëtzebuerg nidderzeloossen, sech dunn awer zeréckgezunn, well se hei am Land kee spezialiséiert Personal fonnt hunn … Dat ze änneren, ass natierlech ee vun de Grënn, firwat dëse BTS iwwerhaapt an d’Liewe geruff gouf!

„Digital Spiller ze entwéckelen heescht net, am däischtere Keller ze versaueren!“, betount de BTS-Verantwortlechen. „Dofir si mir beméit, eis Schüler op en aktiivt an extrovertéiert Beruffsliewe virzebereeden.“ Nieft Disziplinne wéi „Augmented & Virtual Reality“ gëtt et dofir och Fächer wéi Project Management, Comptabilitéit, Rentabilitéit an Entrepreneurship.

Et gëtt och vill gemaach, fir de Kontakt mat der Branche ze fleegen: Engersäits ass d’Schoul op ville Game Conventions vertrueden an och an Initiative wéi dem Talent Hub agebonnen, deen den LAM mat Ënnerstëtzung vun der Regierung gegrënnt huet. D’Missioun vum Talent-Hub ass et, d’Welt vun den Entreprisen an d’Schoul beieneen ze bréngen. En absolute Novum zu Lëtzebuerg ass et, datt sech eng Rei selbstänneg Entrepreneren um Gebitt vun der Spillentwécklung am Schoulgebai an der Rue de la Congrégation mat eegene Büroe niddergelooss hunn. Dës Firmen organiséieren reegelméisseg Interventiounen a Workshops mat de Studente fir ëmmer um leschte Stand vun der Technik ze bleiwen. Zesumme mat de Proffen ënnerstëtzen si déi Jonk Dag fir Dag mat Referater, Rotschléi a vill praktescher Hëllef op hirem Wee.

Vill Achievement, wéi et am Gameplaying heescht, ass also bei dësem Studium gefrot, mee bei sou gudde Startkonditiounen ass de Succès jo bal … virprogramméiert. Bleift deemno just nach ze soen: „Let the games begin!“

En Artikel vum Patrick Calzi