Wéi huet de Mënsch Jeff Strasser déi eenzel Etappe vun senger Karriär erlieft? Hien erënnert sech, dass den Ufank schwéier war, fir Proffi ze ginn. „Déi éischt véier Méint an der Schoul vum Centre de formation zu Metz ware komplizéiert, dat souwuel schoulesch wéi mënschlech – et war e groussen Ënnerscheed zur Schoul am Michel Rodange, wou ech virdru war.“ Hien hat 14 Joer an deemools (1988) goufen et nach net esou vill Jonge vun enger anerer Nationalitéit an der Schoul. „D’Sprooch schwätzt ee mat 14 Joer anescht, mee d’Sprooch ass wichteg fir d’Integratioun.“

Och wann hien zu där Zäit heiansdo an d’Fauscht gebass huet, da war et d’Léift zum Fussball, déi hie weiderbruecht huet. „An der Ekipp war den Zusammenhalt wichteg. Nieft der Konkurrenz hunn déi sozial Wäerter an den Erfolleg vun der Ekipp eng grouss Roll gespillt.“ D’Disziplin war ganz wichteg. D’Famill huet hien en plus net eleng gelooss. „Meng Mamm war derbäi an dat war eng moralesch Ënnerstëtzung fir mech.”

Als Spiller gouf et a Frankräich ni eng negativ Astellung zu senger Nationalitéit. „An Däitschland gouf et do scho méi Konkurrenz.“ Allgemeng Schlussfolgerungen iwwer Ënnerscheeder tëschent de Länner wëll de Jeff Strasser doraus allerdéngs net ofleeden.

Op senge verschiddene Statiounen am Ausland hat de Jeff Strasser als Auslänner ni e Probleem mat de Fans. „Mat der Zäit ass d’Fro vun der Nationalitéit souwisou verschwonnen, bis 1995 war dat Theema mat den neie Bosman-Reegelen net esou fërderlech. Virdru war alles méi komplizéiert“, erënnert sech de Jeff Strasser.