Kenns du eigentlech dee koppege Monni aus dem LOD? De Monni taucht an esou muncher Beispillsaz am Lëtzebuerger Online Dictionaire vum Zenter fir d‘Lëtzebuerger Sprooch op. Et ginn eng Hellewull interessant Detailer zu deem bossege Kärel wéi de Lexikograf an haitegen Direkter vum Zenter fir d’Lëtzebuerger Sprooch Alexandre Ecker schonn 2020 a sengem Artikel an der Warte schreift. An dësem flotten Artikel gi mir esou muncher Detail iwwer de Monni gewuer, zum Beispill datt en an der Arméi war, op ganz ville Plazen engagéiert ass, a gäre Keele spillt (an do och ëmmer den rietse Bauer geréit). An apropos treffen. Scho virun enger Rëtsch Joren huet de Monni seng Frëndin, vun där en sech och haut nach, trotz senger Ierfschaft, aushale léisst, getraff.

Mee wat mécht dee bossegen an aartleche Kadett dann elo do ënne lénks am Eck?

Sécher ass datt de Monni do ënne schonn eng Grimmel méi mécht ewéi nëmme säi Spockes ze dreiwen oder de Spunnes mat de Leit ze maachen a sech gemittlech widder de Bord vun dengem Ecran ze stäipen! Ob een et gleeft oder net, de Monni huet do nawell eng ganz wichteg Roll. Klick emol eng Kéier op de Monni da ginn dir d‘An op ewéi Gënzescheeken! Wann s du nämlech e Premium Abo vum Konterbont hues sinn eng Rei Wierder an all Artikel ugestrach. Klicks du op esou e Wuert kriss du Iwwersetzungen an Erklärungen zum Wuert ugewisen a kanns ausserdeem lauschteren ewéi d’Wuert ausgeschwat gëtt. E Klick op de Monni an d’Ënnersträichungen ginn ausgeblendt.

A wéi ass de koppege Kärel, dee jo awer Dag fir Dag esou munches op der Lee huet, dann elo am Konterbont gelant?

Déi wéineg Zäit déi de Monni nach doheem, bei senger zweeter Fra verbréngt soll jo schliisslech och sënnvoll genotzt ginn. An och der Frënndin geet hien heiansdo ferm op d‘Strëmp an déi ass nawell och net rose wann hien aus (selbstverständlech hirem) Haus ass. A well de Monni jo schonn am LOD eng Hand upeekt an och un der Lëtzebuerger Sprooch interesséiert ass lounch et bal op der Hand datt hien sech beim Konterbont, deem éischte komplett digitale Magasinn op Lëtzebuergesch engagéiert. Säitdeem steet dee koppege Monni do ënne lénks am Eck …