Wann een d’Wuert „Konscht-Musée“ héiert, dann denkt een direkt u bekannten Haiser wéi den Tate Modern zu London, de MoMa zu New York oder, méi nobäi, de Centre Pompidou zu Metz. Ma och de klenge Grand-Duché huet säin „Eck“, an deem modern Konscht gewise gëtt. Zanter 2006 ass genee dësen eng scho bal ikonesch Plaz fir Lëtzebuerg: de Mudam, geleeën am Park Dräi Eechelen, direkt nieft dem historesche Fort Thüngen. Iwwer 800 Konschtwierker sinn am moderne Musée um Kierchbierg doheem, dorënner Biller, Skulpturen, Installatiounen an Digital Art vu Kënschtler aus der ganzer Welt, mee och déi gréisste Sammlung vu Lëtzebuerger Konscht. Verdeelt op dräi Etagen an iwwer 4.000 Quadratmeter Ausstellungsfläch, lueden déi kënschtlerech Zäitzeien awer net just derzou an, Konscht vu gëschter an haut ze kucken, mee och selwer mat hir ze interagéieren an dobäivläicht dat eent oder anert neit Wierk fir muer ze schafen.

De Mudam bezeechent sech selwer als „oppent Haus fir jiddereen“: eng Plaz, wou een Zäit verbréngt, bewonnert, sech ënnerhält, ësst, drénkt a selwer kreativ gëtt. Nieft dem fräie Spadséieren duerch déi verschidde Raim an Hale kann een nämlech och un enger jett geféierten Touren, Workshoppen, Virträg an Diskussiounsronnen deelhuelen, déi all op déi verschidden Alters- an Zilgruppen zougeschneidert sinn. Regulär Féierunge fir Erwuessener ginn et a ville verschiddene Sproochen, esouguer a Liichter Sprooch. Ma och fir Kanner an Erwuessener gëtt et eng spezifesch Offer, well de Mudam huet sech op de Fändel geschriwwen, schonn deene Jéngsten d’Loscht op Konscht ze vermëttelen.